Feronikeli, përgatitjet dhe sezoni i ri

Feronikeli po i vazhdon ushtrimet dhe punën intensive për t’u përgatitur sa më mirë për pjesën e dytë të sezonit. Kampionët e Kosovës madje po ushtrojnë nga dy herë në ditë për t’i mbushur sa më shumë bateritë për sfidat që i presin në pranverë.

Trajneri, Afrim Tovërlani, ndihet i kënaqur me rrjedhën e deritashme të përgatitjeve, ndërsa zbulon se kah fillimi i shkurtit kontingjenti nga Drenasi do të udhëtojë, me gjasë, drejt Turqisë për t’i vazhduar përgatitjet. Ndërkohë, atje pritet zhvillimi i disa ndeshjeve miqësore me disa klube vendëse.

“Kemi filluar të ushtrojmë nga dy herë në ditë, paradite fitnes dhe pasdite me top. Deri tash, përgatitjet kanë shkuar shumë mirë. Po punojmë momentalisht për ngritjen e aftësive fizike”, u shpreh Tovërlani për “Zërin”.

“Më 2 shkurt pritet t’i vazhdojmë përgatitjet jashtë vendit, me gjasë në Turqi, ku pritet të qëndrojmë 10 ditë. Atje do të punojmë në aspektin tekniko-taktik e ndërkohë do të zhvillojmë edhe ndeshje miqësore”, vazhdoi “Toki”.

“Synojmë të mbetemi në krye deri në fund të sezonit. Do të jetë mjaft e vështirë, do të jetë një luftë e ashpër për titull të kampionit në pranverë”, përfundoi ai.