Evis Kushi ministrja e re e Arsimit në Shqipëri, largohet Besa Shahini

Evis Kushi do të jetë ministrja e re e Arsimit në Shqipëri. Lajmin e ka bërë të ditur vetë kryeministri shqiptar Edi Rama, në një bashkëbisedim me Ministren aktuale Besa Shahini dhe deputeten Kushi.

Rama tha se Shahini largohet nga ky post për arsye personale.

“Besa për arsye familjare, pasi ka një familje të krijuar rishtas që e detyron të jetë më shumë në Prishtinë sesa në Tiranë, erdhi para pushimeve dhe më tha që jam në dispozicionin, mund të qëndroj deri në fund të mandatit, por duke qenë se kjo ministri është një përgjegjësi e madhe edhe politike unë mora kohë, zysha do të marrë stafetën”, tha Rama, i cili e falenderoi Shahinin për kontributin e dhënë.

Besa Shahini u emërua Ministre e Arsimit, Sportit dhe Rinisë, më 28 dhjetor të vitit 2018. Ajo ka qenë analiste e pavarur e politikave për arsimin dhe për çështjet e edukimit në Kosovë si dhe zëvendësministre e arsimit në Shqipëri.

Ka punuar në projekte të shoqërisë civile në Kosovës dhe për organizatë të ndryshme ndërkombëtare që kanë për fokus përmirësimin e cilësisë në arsim dhe integrimet evropiane.

Deri në verë 2015, ka punuar si analiste me organizatën me bazë në Berlin, Iniciativa Evropiane për Stabilitet (ESI).