Etnon nuk ndalet me kaq, në korrik sjellin hitin e radhës

Grupi i njohur muzikor, Etnon, po vazhdon të shijojë suksesin e dy këngëve të fundit, “Shake it” dhe “Turn me on”. Të dyja këto këngë qysh në ditët e para të publikimit të tyre arritën të grumbullojnë miliona klikime. Kënga “Shake it”, të cilën Etnon e solli në bashkëpunim me Genta Ismajlin numëron 20 mijë klikime në YouTube.

E për suksesin e këtyre dy këngëve të fundit, producenti Genc Prelvukaj në një intervistë për Telegrafin ka thënë se sukseset e këngëve “Shake it” dhe “Turn me on” i kanë tejkaluar parashikimet e tyre, e sidomos kjo e fundit.

“‘Turn me on’ po ecën më mirë se parashikimet tona. Në më pak se 10 ditë kapi një milion klikime dhe duke pasur parasysh muajin në të cilin gjendemi, me shumë rëndësi për besimin mysliman dhe muajin e Kampionatit Evropian, them që është jashtëzakonisht mirë”, deklaroi Prelvukaj.

Ai ka shtuar se “Turn me on” nuk mund të arrijë suksesin e “Shake it”, mirëpo i afrohet ndjeshëm.

“Suksesin e këngës ‘Shake it’ kënga e re nuk e arrin, mirëpo i afrohet ndjeshëm dhe kjo është gjëja më e mirë. Çdo këngë nuk qëllohet me 30 milionë, megjithatë kënga që i arrin mbi katër milionë klikime them që është hit i padiskutueshëm”, tha Genci.

E pas këtyre sukseseve të njëpasnjëshme, grupi Etnon nuk e ka ndërmend të ndalet. Genci ka zbuluar edhe planet e tyre të cilat janë për muajin korrik. Ai ka bërë të ditur se shumë shpejt do ta finalizojnë projektin e tyre më të ri.

“Jemi në prag të finalizimit të këngës së re që do ta publikojmë në pjesën e parë të korrikut dhe pastaj pauzojmë deri në vjeshtë”, ka treguar Genc Prelvukaj duke mos zbuluar më shumë detaje rreth këtij projekti.

E tashmë kur stina e verës është në prag, edhe grupi i Etnon ka një agjendë të ngarkuar. Dhe të gjithë ju që jeni adhurues të muzikës së tyre, ata do të mund t’i gjeni në të katër shtetet ku jetojnë shqiptarët. Etnon do të jenë nga Saranda në Mitrovicë e nga Ulqini në Strugë. /Telegrafi/