Erolld Belegu: Arben Fetahu është favorit për të parin e FBK-së

Erolld Belegu javë më parë dha dorëheqje prej Federatës së Basketbollit të Kosovës (FBK).

Tashmë janë caktuar edhe zgjedhjet e jashtëzakonshme për të parin e FBK-së.

Ish basketbollisti i Prishtinës, Arben Fetahu është favoriti kryesor që të bëhet drejtues i FBK-së.

E gjithë kjo pasi Fetahu është kandidati i vetëm i propozuar nga bordi i Federatës së Basketbollit të Kosovës.

“Edhe një dëshmi për punën e bërë mirë në FBK! Arben Fetahu kandidat i vetëm i propozuar edhe nga bordi i Federatës për vetëm dhjetë ditë është i nominuar edhe nga më shumë se njëzet klube e shoqata me të drejtë votë që përbëjnë afro 30 nga 40 votat e mundshme! Jam i gëzuar që anëtarët e FBK-së dëshirojnë ta ndjekin vijën e sigurt, korrekte dhe zhvillimore që ky bord ka bërë në 5 vitet e kaluara! Suksese Beni”, ka shkruar Belegu në Facebook.

Ish-reprezentuesi i përfaqësueses sonë aktualisht është pjesë e Komitetit Ekzekutiv të FBK-së.

Ndryshe, Belegu është tërhequr nga posti i kreut të Federatës së Basketbollit të Kosovës dhe do të vazhdojë të jetë Këshilltar i Jashtëm Politik i kryeministrit të Kosovës.

Lexo po ashtu Erolld Belegu: Largimi nga FBK ishte ndër vendimet më të vështira, do të vazhdoj të kontribuoj në zhvillimin e sportit

Njoftimin e ka bërë vet Belegu, i cili ka treguar se pasi ishte emëruar në postin e këshilltarit i ishte drejtuar Agjencisë Kundër Korrupsionit (AKK) lidhur me mundësinë e ekzistimit të konfliktit të interesit ndërmjet angazhimeve jashtë Qeverisë së Kosovës. /Telegrafi/