Emiratet e Bashkuara Arabe konfiskojnë amfetaminë në vlerë të një miliard dollarëve

Policia në Emiratet e Bashkuara Arabe ka sekuestruar 13 ton pilula amfetamine të kontrabanduara përmes mobilieve shtëpiake.

Më shumë se 1 miliard dollarë (940 milionë euro) drogë e njohur si Captagon u gjet pasi oficerët u njoftuan për një kontejner të dyshimtë të transportit.

Një video tregoi policinë e Dubait duke grisur panelet dhe dyert prej druri ku ishin fshehur 86 milionë pilula, raporton bbc.

I quajtur “kokaina e të varfërve”, Captagon thuhet se është një nga drogat më të njohura mes të rinjve në Gjirin Persik.

Policia nuk përmendi origjinën e dyshuar të dërgesës së paligjshme, por Captagon besohet se prodhohet në sasi të mëdha në Siri.

Thellimi i varfërisë thuhet se ka detyruar shumë sirianë të zakonshëm të përfshihen në tregtinë e paligjshme të Captagonit, e cila vlen miliarda dollarë.

Policia e Dubait njoftoi se sekuestroi pesë kontejnerë transporti që mbanin 13 tonë pilula në një operacion të madh.

Videot që ata publikuan shfaqin oficerët që gjurmonin kontejnerët dhe monitoronin të dyshuarit, si dhe çmontonin 651 dyer dhe 432 panele druri për të arritur te lënda narkotike.

Gjatë operacionit janë arrestuar gjashtë persona. Besohet të jetë një nga transportet më të mëdha të tilla të kapur ndonjëherë.

Katërmbëdhjetë ton pilula Captagon të fshehura në kazanët e letrës dhe rrotat e ingranazheve u kapën në Itali në vitin 2020, ndërsa vitin e kaluar Arabia Saudite sekuestroi 46 milionë pilula amfetamine të kontrabanduara në një ngarkesë mielli. /Telegrafi/