Emigracioni i paligjshëm, KE propozon plan veprimi për bashkëpunim me Ballkanin Perëndimor

Stafi nga agjencia e kufirit të jashtëm të Bashkimit Evropian mund të vendoset së shpejti në kufijtë jashtë BE-së në Ballkanin Perëndimor, si pjesë e një plani për të frenuar ardhjet e parregullta nga rajoni. Lajmi u njoftua sot nga Komisioni Evropian.

“Numri që ne kemi tani në Ballkanin Perëndimor është rreth 500 personel nga Frontex, por sot ata janë të vendosur vetëm në kufirin midis partnerëve të Ballkanit Perëndimor dhe kufijve të jashtëm të BE-së”, u tha gazetarëve Komisionerja për Punë të Brendshme, Ylva Johansson.

“Me një mandat të ri, do të jetë e mundur të vendosen edhe brenda, midis dy partnerëve të ndryshëm të Ballkanit Perëndimor”, tha ajo, duke shtuar se i takon Frontex-it të vendosë për numrat e nevojshëm.

Kjo masë është pjesë e Planit të Veprimit për Ballkanin Perëndimor të propozuar nga Komisioni Evropian për të trajtuar rritjen e emigrantëve që hyjnë në BE, përmes Ballkanit Perëndimor.

Më shumë se 128,000 kalime të paligjshme kufitare në BE janë regjistruar përmes Ballkanit Perëndimor gjatë 10 muajve të parë të vitit, sipas të dhënave të Frontex. Kjo përfaqëson një rritje prej 168% nga e njëjta periudhë e vitit 2021.

Një shtyllë tjetër e planit të Komisionit, e zbuluar një ditë përpara një samiti BE-Ballkani Perëndimor në Shqipëri, është përafrimi më i mirë i vizave midis vendeve të Ballkanit Perëndimor dhe BE-së për të siguruar që shtetasit e huaj që udhëtojnë pa viza në Ballkanin Perëndimor nuk do të kalojnë në BE.

Shumica e vendeve të Ballkanit Perëndimor kanë marrëveshje pa viza me BE-në. Johansson tha se Serbia është porti kryesor i hyrjes në BE për njerëz të tillë.

Përafrimi i vizave pritet të diskutohet nga krerët në samitin BE-Ballkani Perëndimor në Tiranë të martën.

Në agjendë do të jetë gjithashtu përafrimi me politikën e jashtme dhe të sigurisë të BE-së, duke përfshirë regjimet e sanksioneve, një parakusht për pranimin në bllok.

Samiti i nesërm vjen disa ditë para takimeve të ministrave të Punëve të Brendshme dhe liderëve të BE-së në Bruksel, ku do të diskutohet statusi kandidat për Bosnjë-Hercegovinën dhe liberalizimi i vizave për Kosovën. /Telegrafi/

The Action Plan on the #WesternBalkans ~ @YlvaJohansson

1⃣Strengthening border management along the routes

2⃣Swift asylum procedures and support reception capacity

3⃣Fighting migrant smuggling

4⃣Enhancing readmission cooperation and returns

5⃣Achieving visa policy alignment

— EU Home Affairs (@EUHomeAffairs) December 5, 2022