Ekspertët: Partitë kalkulojnë për vendoret (Video)

Njohësit e çështjeve politike vlerësojnë se nuk duhet të humbet më shumë kohë për formimin e qeverisë pasi situata “status quo” dëmton shtetin dhe perspektivat e saj. Në emisionin e mbrëmshëm 360 gradë në Alsat-M analisti Albert Musliu tha se BDI-ja duhet ti sigurojë firmat LSDM-së për konstituimin e qeverisë pasi koalicionin me Zaevin do ta kishte më lehtë ta justifikojë përpara elektoratit sa sa rinovimin e partneritetit me Gruevskin.

“Mendoj se realisht BDI e ka shumë më lehtë që edhe para elektoratit të saj ta justifikojë bashkëpunimin me LSDM-në se sa eventualisht ta refuzon LSDM-në për kushtet të cilat ne e shohim edhe prej liderit të opozitës se relativisht janë të pranueshme për LSDM-në dhe ti kthehet VMRO DPMNE me të njejtat kushte ku nuk do të nënkuptohej Prokuroria Speciale”, deklaroi analisti Albert Musliu.

Ndërkaq Visar Ademi vlerëson se partitë përpiqen të blejnë kohë deri në zgjedhjet lokale dhe varësisht nga rezultatet zgjedhjet e parakohshme parlamentare do ti organizonin në shtator.

“Ka edhe një variant tjetër që e besoj un të krijohet një lloj qeverie me LSDM, të blihet sa më tepër kohë tani deri sa ekziston ky lloj vakumi, apo limbo situatë, të shkohet deri në zgjedhjet lokale me pozicione të paprekura, të ketë një marrëveshje të heshtur ndërmjet BDI-së dhe VMRO-së dhe në qoftë se në zgjedhjet lokale krijohet një 61% apo 70% të vendeve rurale dhe urbane ku do të fitonte VMRO-ja me BDI-në të shkohet në zgjedhjet e parakohshme në shtator dhe nga atje të filloheshin të forcoheshin pozicionet”, tha analisti Visar Ademi.

Ndërsa Besa dhe Aleanca për Shqiptarët janë shprehur të gatshme ta mbështesin Zaevin si mandatar për formimin e qeverisë, BDI-ja ende nuk është përcaktuar për asnjërën nga 5 opsionet, koalicionin me VMRO-në, me LSDM-në, qeveri të zgjeruar, të qëndrojë në opozitë apo për zgjedhje të parakohshme./Telegrafi/