I vogël, i lehtë dhe i dashur - rrallëherë kalon 1.8 kg
Emri i tij vjen nga fakti se gëzofi i tij duket më i trashë rreth qafës dhe faqeve, pothuajse duke formuar një figurë luani.
I ëmbël, i shoqërueshëm dhe ekspansiv, ai lidhet me familjen e tij vetëm pas disa ditësh. Ditët e para vendoseni në kafaz dhe flisni me të, por mos e merrni nga kafazi.
Është e rëndësishme ta lini të eksplorojë lirshëm, duke u përpjekur të respektojë kohën e tij dhe të mos e detyroni kurrë të ndërveprojë, por përkundrazi ta shpërbleni sa herë që bën një hap përpara (qoftë metaforikisht).
Dhe mos ndaloni së foluri me të.
Duke qenë se është shumë i zbutur, është një kafshë shtëpiake ideale për familjet me fëmijë. Përderisa nuk janë shumë të vegjël, sepse gjestet e dhunshme apo të papritura mund të rrezikojnë shëndetin e tij. Duke pasur parasysh kockat e tij delikate, lepuri me kokë luani është një kafshë që do të ketë nevojë për kujdes të veçantë.
Ai pëlqen të qëndrojë në grupe, ndaj nuk do ta ketë të vështirë të njohë menjëherë pronarin e vet dhe të sillet ndaj të tjerëve si ndaj miqve. Megjithatë, ka më pak prirje për të ndjerë empati të menjëhershme me kafshë të tjera. Këtë lepur duhet ta mësoni me qetësi me praninë e qenit ose maces.
Në përgjithësi, nuk rekomandohet të lihen vetëm me to, pasi qeni ose macja mund ta dëmtojnë duke u përpjekur të luajnë me të. Një racë qeni që i përshtatet më shumë këtij lepuri është Cavalier King, transmeton Telegrafi.
Nëse kujdeseni mirë për të, mund të jetojë deri në 10 vjet. Si të gjithë lepujt, ka veshë shumë të ndjeshëm, të cilët nuk duhet të tërhiqen kurrë.
Po ashtu, është e rëndësishme të mos e lini të endet pa mbikëqyrje nëpër shtëpi dhe herë pas here të kontrolloni gjendjen e dhëmbëve - një pikë e dobët për të, pasi shpesh janë burim abscesesh ose infeksionesh.
Dhëmbët i rriten vazhdimisht, prandaj është shumë e rëndësishme që dieta e tij të jetë e larmishme dhe e pasur me fibra, për të shmangur probleme si mbyllja e parregullt e dhëmbëve.
Duhet t’i kushtoni vëmendje të madhe edhe veshëve, syve dhe gëzofit. Gëzofi i tij është i gjatë dhe i butë, ndaj duhet të krehët rregullisht për të shmangur krijimin e nyjeve dhe për ta mbajtur në gjendje të mirë.
Është mirë ta krihni një herë në javë për të parandaluar nyjet dhe për të shmangur që lepuri me kokë luani të gëlltisë qime të tepërta, ndërsa gjatë periudhës së ndërrimit të qimeve, këshillohet krehja çdo ditë.
Megjithatë, mbani mend: mos e lini gjithmonë në kafaz.
Është një kafshë shoqërore dhe ka nevojë të kalojë sa më shumë kohë jashtë kafazit, sidomos sapo të ktheheni në shtëpi. Koha e tepërt në kafaz mund ta kthejë në një lepur të vogël nervoz, të palumtur dhe obez. /Telegrafi/
