E kapi për fyti e për flokësh ish bashkëshorten, e me tavolinë druri e goditi në kokë, tetë vjet burgim për të pandehurin në Gjakovë

Gjykata Themelore në Gjakovë e ka dënuar me tetë vjet burgim të pandehurin Sh. P., shtetas i Republikës së Kosovës, për vepër penale “Lëndimi i rëndë trupor”.

I pandehuri Sh. P., akuzohet se më datë 19 dhjetor 2021 rreth orës 19:00 në Gjakovë, duke përdorur mjetin e fortë i ka shkaktuar lëndime të rënda trupore ish bashkëshortes e tij të dëmtuarës A. A., në atë mënyrë që pas një zënke i pandehuri në shenjë nervoze e kap për fyti e gjuan për dysheme deri sa të dëmtuarës fillon t’i humbë vetëdija.

“…Për një moment kur fillon të kthjellet e njëjta ngritët dhe mundohet të ikë, por i pandehuri arrin ta kapë për flokë dhe merr një tavolinë druri e godet në kokë dhe pjesë tjera të trupit deri sa e dëmtuara mbetet e shtrirë për dysheme pa ndjenja dhe tërësisht e gjakosur, e më pas nga ambulanca e dëmtuara dërgohet fillimisht në spitalin ‘Isa Grezda‘ në Gjakovë e nga spitali për shkak të gjendjes së rëndë shëndetësore dërgohet për trajtim të mëtutjeshëm në QKUK-Prishtinë”, thuhet në njoftim.

Kundër këtij aktgjykimi, palët kanë të drejtë ankese në afat prej 30 ditëve nga dita e pranimit të aktgjykimit në formë të shkruar. /Telegrafi/