I dyshuari i dytë në rastin “Haraçi” Zoran Milevski, dërgohet në arrest shtëpiak

I dyshuari i dytë në rastin “Haraçi” Zoran Milevski – Kiçeec, do të lëshohet në arrest shtëpiak, pasi gjykatësi i procedurës paraprake, pas mendimit pozitiv e ka pranuar propozimin e mbrojtjes.

“Gjykatësi i procedurës paraprake pranë Gjykatës Penale Shkup, duke vepruar me propozim të avokatëve të Z.M, në lëndën e njohur si ‘Haraçi’, për shfuqizimin e masës së paraburgimit, të njëjtën e ka dorëzuar për mendim tek prokurori publik kompetent”.

“Sot pas mendimit poztitiv nga prokurori, që propozimi i mbrojtjes të pranohet, gjykatësi i procedurës paraprake në pajtim me ligjet, ka sjellur vendim me të cilin masën e paraburgimit e zëvendëson me atë të arrestit shtëpiak”, thuhet në njoftimin e Gjykatës Penale.

Ata shtojnë se duke pasur parasysh se ankesat nuk shtyjnë zbatimin, vendimi është dërguar tek palët.

Ndryshe, Zoran Milevski është i dyshuari i dytë në rastin “Haraçi”, pas Bojan Jovanovskit i njohur si “Boki 13”. Ndërsa e dyshuara e tretë është ish-kryeprokurorja speciale Katica Janeva./Telegrafi/