Dyshime për një “komplot në shkallë të gjerë” gjatë Lojërave Olimpike – arrestohet kuzhinieri rus në Paris

Një kuzhinier rus, i cili ka jetuar në Francë për 14 vjet, është arrestuar me dyshimin se ka komplotuar me “një fuqi të huaj” për të organizuar akte “destabilizimi” në shkallë të gjerë gjatë Lojërave Olimpike në Paris.

Sipas mediave të huaja, përcjell Telegrafi, 40-vjeçari u arrestua gjatë një bastisjeje në banesën e tij në qendër të Parisit të dielën.

Siç thuhet më tej, aty u gjet një dokument i lidhur me një njësi elitare të forcave speciale ruse që vepronte nën komandën e FSB-së, një trashëgimtar i KGB-së.

Një hetim gjyqësor është hapur mbi akuzat për shpërndarjen e “informatave me një fuqi të huaj me qëllim provokimin e armiqësive në Francë”, një krim i dënueshëm me 30 vjet burgim.

Komploti i dyshuar nuk besohet të ketë qenë i lidhur me terrorizmin.

Personi, emri i të cilit nuk bëhet i ditur, është akuzuar për këtë akuzë në të njëjtën ditë dhe është vendosur në paraburgim.

Ceremonia ambicioze e hapjes së Parisit 2024 do të organizohet në brigjet e Seine të premten në mbrëmje dhe prej kohësh ekziston shqetësimi se Rusia mund të kërkojë “të ndërhyjë në ngjarje”.

Prokurorët në Paris thanë se kontrolli i banesës së shtetasit rus ishte kryer me kërkesë të ministrisë së brendshme franceze.

Lexo po ashtu Me afrimin e Olimpiadës, Parisi nxjerr 75,000 trupa në rrugë - dislokimi më i madh në kohë paqeje i forcave të sigurisë në historinë franceze

Sipas njoftimeve të dhëna për mediat franceze, agjentët gjetën prova që sugjeronin se burri po përgatiste një “projekt në shkallë të gjerë” që mund të kishte pasur pasoja “serioze” gjatë tri javëve të lojërave.

Gazeta franceze, Le Monde, raportoi se shërbimet e inteligjencës kishin dëgjuar një telefonatë dy muaj më parë midis individit dhe një punonjësi të shërbimeve të inteligjencës ruse, në të cilën i dyshuari kishte deklaruar se “francezët do të kenë një ceremoni hapjeje siç nuk ka pasur kurrë më parë”.

Megjithatë, nuk janë dhënë detaje në lidhje me natyrën e komplotit të supozuar për të destabilizuar lojërat.

Gazeta raportoi se i arrestuari ishte trajnuar si kuzhinier në Paris dhe se ai kishte marrë pjesë në reality ruse dhe shfaqje gatimi.

Ai e kishte përshkruar veten në CV-në e tij si një “kuzhinier privat”.

Ai mbërriti për herë të parë në Francë në vitin 2010 dhe kaloi ca kohë në Courchevel, një vendpushim skish i njohur për elitën ruse, ku punoi në një restorant me yll Michelin, përpara se të shkonte në Paris në 2012. /Telegrafi/