Dy të dyshuar janë arrestuar për vjedhjen e xhevahireve të çmuara të kurorës nga muzeu i Luvrit në Paris, thonë mediat franceze.
Sipas zyrës së prokurorit të Parisit, njëri nga burrat ishte marrë në paraburgim ndërsa po përgatitej të merrte një fluturim nga Aeroporti Charles de Gaulle.
Sende me vlerë 88 milionë euro (102 milionë dollarë) u vodhën nga muzeu më i vizituar në botë të dielën e kaluar, kur katër hajdutë me vegla elektrike hynë me forcë në ndërtesë në mes të ditës.
Ministri i Drejtësisë i Francës ka pranuar që atëherë se protokollet e sigurisë "dështuan", duke e lënë vendin me një "imazh të tmerrshëm".
Në një deklaratë, zyra e prokurorit të Parisit tha se arrestimet ishin bërë të shtunën në mbrëmje, pa specifikuar se sa persona ishin marrë në paraburgim.
Policia e specializuar mund t'i marrë në pyetje ata deri në 96 orë.
Ajo kritikoi "zbulimin e parakohshëm" të informacionit në lidhje me rastin, duke shtuar se kjo pengoi përpjekjet për të rikuperuar xhevahiret dhe për të gjetur hajdutët.
Banda thuhet se mbërriti në orën 09:30, pak pasi muzeu u hap për vizitorët, transmeton Telegrafi.
Të dyshuarit mbërritën me një ashensor mekanik të montuar në automjet për të hyrë në Galerie d'Apollon (Galeria e Apollonit) nëpërmjet një ballkoni afër lumit Sena.
Fotografitë nga vendi i ngjarjes treguan shkallën që të çonte në një dritare të katit të parë.
Dy nga hajdutët hynë brenda duke prerë dritaren me mjete elektrike.
Më pas ata kërcënuan rojet, të cilët evakuuan ambientet dhe prenë xhamin e dy vitrinave që përmbanin bizhuteri.
Një raport paraprak ka zbuluar se një në tre dhoma në zonën e muzeut të bastisur nuk kishte kamera, sipas mediave franceze.
Policia franceze thotë se hajdutët qëndruan brenda për katër minuta dhe u arratisën me dy skuterë që prisnin jashtë në orën 09:38.
Masat e sigurisë janë shtrënguar rreth institucioneve kulturore të Francës, thanë zyrtarët. /Telegrafi/
