Duka: Gjendja në Dibër stabile, masat duhet rreptësisht të respektohen

Kryetari i Komunës së Dibrës, Hekuran Duka sot në konferencën e rregullt për shtyp vlerësoi stabile gjendjen epidemiologjike në komunë dhe këtë, siç tha ai, e vërteton fakti që nuk ka të infektuar të rinj dhe poashtu nuk ka pacientë në spital me simptoma të coronavirusit.

“Ne duhet edhe më tej këtë gjendje stabile mbajmë, me respektim të rekomandimeve, dhe kjo është izolim jgatë orës policore, mosdalje nga shtëpia pa pasur nevojë, mbajtja e largësisë trupore, mbajtja e maskave mbrojtëse. Ju bëj apel që nëse dikush ndjen simptoma të gripit apo simptoma të coronavirusit menjëherë të paraqitet në spitalin e përgjithshëm”, tha Duka, përcjell Telegrafi Maqedoni.

Ai njoftoi se në mbledhjen e Shtabit operativ komunal, me të cilin udhëheq ai, është biseduar për pasojat ekonomike nga gjendja aktuale me pandeminë.

“Dihet se Dibra dhe Qendër Zhupa për një muaj ishin në karantinë dhe kjo goditi ekonominë, posaçërisht turnizmin me banja, hoteleritë, ata që merren me zanatet, kafenetë dhe transportuesit. Do të mundohemi të përgatisim analizë të përgjithshme se sa janë humbjet e tyre dhe me këtë studim do të kërkojmë nga Qeveria t’i mbulojnë humbjet”, tha Duka.

Ai përmendi edhe problemin e pagesës së vogël të ndërmarrjes publike ‘Standard’ për ujë dhe mbeturina duek kërkuar nga amvisëritë dhe subjektet juridike që t’i paguajnë pagesa, në mënyrë që, siç tha ai, të solidarizohen me punonjësit në ndërmarrje të cilët gjatë gjithë kohës kanë qenë në terren për të mbledhur mbeturinat, kanë dezinfektuar dhe vazhdojnë t’i lajnë rrugët./Telegrafi/