Duda Balje për sulmin në Zubin Potok: Mos vallë duhet dikush të vritet, për të reaguar institucionet komunale në veri

Deputetja e Kuvendit të Kosovës, njëherësh kryetarja e komisionit parlamentar për të drejtat e njeriut, Duda Balje ka reaguar pas sulmit të armatosur ndaj grupit të atletëve “Kosovo Mountain Club” në veri të Kosovës.

Balje e konsideron shqetësues këtë lajm, derisa thotë se ky është mesazh për institucionet e vendit.

Deputetja nga komuniteti boshnjak  ka kritikuar edhe mungesën e ndonjë reagimi nga Komuna e Mitrovicës Veriore.

Postimi i plotë:

Reagim: Lidhur me rastin shqetësues dhe të rrezikshëm të gjuajtjes me armë sot në veri të shtetit të Kosovës!

Rasti i sotëm i gjuajtjes me rafale nga armë në veri të Kosovës ( Zubin Potok) është shumë shqetësues dhe shumë i rrezikshëm që ka mesazh për institucionet e Republikës së Kosovës.

Është e frikshme se si asnjë zyrtarë komunal nga veriu nuk po reagon në këtë ngjarje të papresedan. Çka duhet të ndodhë më shumë që kryetari i komunës së Mitrovices Veriore ( ka qenë zv.minister në MPB ) dhe nënkryetarja e kësaj komune Adrijana Hoxhiq të reagojnë. Mos vallë duhet dikush të vritet e të derdhet gjak të reagojnë!?

Si kryetare e komisionit parlamentar për të drejtat e njeriut, e dënoi fuqishëm rastin e sotëm te gjuajtjes me armë ndaj atletve kosovar në veri. Institucionet përgjegjëse duhet të marrin masa të menjëhershme dhe të fuqishme për zbardhjen në detaje të këtij rasti.