I droguar dhe i dehur në timon përfshihet në aksident, arrestohet shoferi në Tiranë

Një person me iniciale R.M është arrestuar nga Policia në Tiranë, pasi drejtonte mjetin nën efektin e lëndëve narkotike dhe alkoolit.

Sipas njoftimit të policisë, shoferi fillimisht ka humbur kontrollin e mjetit ka dalë nga karrexhata dhe ka përfunduar në një banesë private.

Pas hetimeve të policisë ka rezultuar se shoferi ishte nën efektin e drogës. Ai është shoqëruar për veprime të mëtejshme procedurale.

Njoftimi i Policisë Rrugore të Tiranës:

Shkon në 116 numri i drejtuesve të mjeteve që kanë rezultuar nën efektin e drogave, pas testimit me aparatin AquilaScan. Nuk rregullon shpejtësinë me mjet në qendra të banuara, humb kontrollin e drejtimit të mjetit, del nga karrexhata dhe si pasojë përfundon në banesë private.

Drejtuesi i automjetit me iniciale R.M, ka manifestuar sjellje të dyshimta në raport me kërkesat ligjore të punonjësve të policisë, dhe nga verifikimi me drogë-testues rezultoi nën efektin e lëndëve droguese THC, si dhe në gjendje të dehur.

Sa më sipër, u bë menjëherë kapja në flagrancë e drejtuesit të automjetit si i dyshuar për veprën penale “Drejtim mjeti në mënyrë të parregullt”, parashikuar nga neni 291 i Kodit Penal të Republikës së Shqipërisë. /Telegrafi/