Dortmundi mposht Herthan, mban gjallë shpresat për titull

Borussia Dortmundit i ka mjaftuar një gol në ndeshjen e javës së 30-të në Bundesliga për të regjistruar fitore kundër Hertha Berlinit në Signal Iduna Park.

Gjysma e parë e takimit nuk prodhoi shumë raste shënimi, ashtu që skuadrat shkuan në pushim pa ndryshim rezultati.

Në minutat e para të pjesës së dytë, vendasit patën një rast shumë të mirë shënimi kur Thorgan Hazard e nxori në rast shumë të mirë Jadon Sanchon, por ai goditi jashtë portës.

Skuadra mysafire rrezikoi në anën tjetër përmes Alexander Esswein, goditja e të cilit po ashtu përfundoi jashtë.

Rezultati u zhbllokua në minutën e 58-të. Emre Can krijoi hapësirë në qendër të zonës dhe e dërgoi topin në rrjetë.

Me fitoren e regjistruar, Borussia Dortmundi vazhdon ta ndjekë Bayern Munichun me shtatë pikë prapa, ndërkohë që kanë mbetur edhe katër xhiro (12 pikë në dispozicion) deri në fund të kampionatit.

Hertha Berlini është në një pozitë komode në tabelë (në vend të nëntë) larg zonës së rrezikut dhe madje mund të kërkojë një vend në Ligën e Evropës në ndeshjet e mbetura. /Telegrafi/

https://twitter.com/BRGoals/status/1269326598303625225

https://www.youtube.com/watch?v=wcWKYunjU5I