DokuFest dhe UNICEF synojnë fuqizimin e të rinjve të Kosovës përmes filmit dhe tregimit

DokuFest ka njoftuar se në bashkëpunim me UNICEF-in kanë nisur projektin YESS, për të fuqizuar të rinjtë e Kosovës përmes tregimit dhe filmbërjes.

Synimi është që të rinjve t’ju ofrohen mjetet dhe platformat për t’u shprehur në mënyrë krijuese duke adresuar çështje kritike sociale.

“Një nga aktivitetet kryesore është zhvillimi i 10 tregimeve të shkurtra me interes njerëzor. Në partneritet me UNICEF-in, kjo iniciativë do të përfshijë afërsisht 250 studentë nga 11 komuna të synuara, duke u ofruar atyre trajnime praktike në tregim, fotografi dhe kinematografi. Trajnimi, i organizuar në nivel komunal, do të zhvillohet në dy ditë dhe do të përfshijë ushtrime praktike për t’i ndihmuar studentët t’i zotërojnë këto aftësi”, thuhet në njoftim, raporton Telegrafi.

Përveç bazave të tregimit, pjesëmarrësit do të përfitojnë edhe nga trajnimi i editimit pas prodhimit, duke i lejuar ata të finalizojnë filmat e tyre me ndihmën e mbështetjes së vazhdueshme nga ekipi i DokuFest.

“Projekti është krijuar për të frymëzuar kreativitetin, fuqizimin e të rinjve dhe nxitjen e angazhimit qytetar. Duke i pajisur të rinjtë me këto aftësi të vlefshme, DokuFest dhe UNICEF synojnë të inkurajojnë vetë-shprehjen dhe tregimin që trajton çështje të rëndësishme sociale, duke sjellë përfundimisht ndryshime pozitive në komunitetet e tyre”, thuhet në njoftim, raporton Telegrafi.

Gjithashtu theksohet se këto iniciativa të përqendruara te të rinjtë përputhen me misionin më të gjerë të DokuFest për të ushqyer kreativitetin dhe fuqizuar gjeneratën e ardhshme të filmbërësve dhe artistëve, duke bërë një ndikim domethënës në përhapjen kulturore dhe sociale të Kosovës. /Telegrafi/