DKA-të: Vonesa e teksteve shkollore, keqmenaxhim nga MASHTI në procesin mësimor

Në prag të fillimit të vitit të ri shkollor, ministrja e Arsimit, Arbërie Nagavci ka takuar drejtorët e Drejtorive Komunale të Arsimit me ç’rast kanë diskutuar për monitorimin e furnizimit me tekstet shkollore në gjithë komunat.

Pas takimit, Drejtoresha Arsimit në Prishtinë, Besianë Musmurati, tha se situata e krijuar për blerjen e librave dëshmon një keqmenaxhim nga ana e Ministrisë së Arsimit për procesin mësimor.

Musmurati tutje u shpreh se për komunat të cilat nuk kanë librari nuk e di se çfarë do të ndodhë as ministrja Nagavci.

“Prej takimit të sotëm e pamë edhe fatkeqësisht e konfirmuam që ka pas një keqmenaxhim të procesit, jemi vonuar shumë, kemi ende shumë pyetje për të cilat nuk morëm përgjigje, komunat të cilat nuk kanë fare librari ende nuk e dinë se çfarë do të bëjnë, nuk e din as ministrja, shtatori po duhet me na prit me telashe te reja”, tha drejtoresha.

Po ashtu, Musmurati shtoi se ka shumë aplikime për tekste shkollore, por nuk mungojnë edhe pengesat të cilat po hasin prindërit gjatë aplikimit.

Lexo po ashtu SBASHK: Viti shkollor do të nis me vështirësi, shkak eksperimenti i gabuar i MASHTI-it me tekstet shkollore

“Na u tha që qëllimi ka qenë me ia lehtësua edhe barrën komunave, sepse kemi pasur probleme me shpërndarje të librave gjë që ne e falënderojmë ministrinë… që po mendon për këtë problem, por ne kemi probleme tjera që janë shumë më serioze dhe që për cilat nuk po marrim përgjigje”.

“Për ne është me rëndësi që mësimi me fillua më 1 shtator, ashtu- kështu do të jetë e premte, tre katër ditët e para do të shkojnë më shume me çështje administrative dhe pastaj do të shohim se sa do të ketë aplikime dhe si do të shkojë mësimi. Ne si komuna u zotuam, do të bëjmë monitorimin e gjendjes me parë se si po shkon, normalisht i gëzohemi lajmit se ka shumë aplikime, por po e shohim se po ka edhe shumë pengesa”, u shpreh ajo.

Ndërsa, Drejtori i Arsimit në Klinë, Qemajl Sejdiu tha se ka kërkuar nga MASHTI-i që fillimi i vitit të ri shkollor të nis më datën 4 shtator, pasi sipas tij është e pamundur të fillojë të premten më 1 shtator, shkruan KP.

“Disa drejtor pyetën rreth kostos së rimbursimit të prindërve për librat, fokusimi ishte më së shumti të një libër i veçuar që tha se ishte 27 euro, ndërsa te librat tjerë që ka ndryshime të çmimeve nuk kishte”.

“Ne si komunë nuk kem librari, tash shtëpitë botuese e kanë ofruar një lokacion fatmirësisht është mirë që për shkak që prindërit mos me u keqtrajtuar, ne kemi kërkuar nga Ministria që së paku më 4 shtator me nis mësimi, jo më 1 shtator, sepse e dimë që është e pamundur që nxënësit të kenë librat”, theksoi Sejdiu.

Ai u shpreh se ka pasur shqetësime se prindërit mund të i kopjojnë librat e të mos i blejnë ato.

“Kishte edhe shqetësime që prindërit munden me shkua me i kopjua librat. Komuna e Klinës e ka këtë gjendje, ne si drejtori e arsimit zotohem para juve që çdo nxënës kur të fillon vitin ka me pas librat qoftë për një kohë të caktuar deri sa të rimburson, edhe prindërit të kenë mundësi me i ble librat”.

“Këta u thirren kështu se ka pasur rezultate të mira ‘e-Kosova’ për shkak të shtesave… Patë edhe këtu citime ministrja, e cila tha se po i akuzoni prindërit për analfabetë, nuk ka të bëjë më këtë pjesë, po ne e dimë shumë mirë se ka gjenerata që kanë kryer shkollime, por nuk dinë me përdor teknologjinë, d.m.th. kjo dallon prej asaj që cituar aty”, tha Sejdiu.

Ministria e Arsimit ka marr vendim për rimbursimin e parave tek prindërit në mënyrë që ata t’i blejnë pastaj tekstet shkollore për fëmijët e tyre për vitin e ri shkollor.