Diplomatët amerikanë dhe rajonalë takohen për të diskutuar të ardhmen e Sirisë

Diplomatët e lartë nga SHBA, Turqia, BE dhe vendet arabe janë takuar në Jordani për bisedime mbi Sirinë, ndërsa fuqitë rajonale dhe globale përpiqen për ndikim mbi cilëndo qeveri që zëvendëson presidentin e rrëzuar Bashar al-Assad.

Bëhet e ditur se administrata e presidentit amerikan në largim Joe Biden ka filluar të angazhohet me grupet rebele fitimtare, duke përfshirë Hayat Tahrir al-Sham (HTS).

Biden dërgoi Sekretarin e Shtetit Antony Blinken në rajon këtë javë për të kërkuar mbështetje për parimet që Uashingtoni shpreson se do të udhëheqin tranzicionin politik të Sirisë, siç është respekti për pakicat.

Ndërkohë fqinji verior i Sirisë, Turqia ka mbështetur prej vitesh forcat opozitare siriane që synojnë të rrëzojnë Assadin dhe është gati të luajë një rol me ndikim në Damask.

Ministri i Jashtëm turk Hakan Fidan njoftoi se ambasada e vendit të tij në kryeqytetin sirian do të rifillojë punën të shtunën.

Ndërkohë Jordania po priste mbledhjen në Akaba, shkruan Reuters, përcjell Telegrafi.

Blinken, i dërguari i posaçëm i OKB-së për Sirinë, Geir Pederson dhe shefja e politikës së Jashtme të BE-së, Kaja Kallas, Fidan dhe ministrat e Jashtëm nga Jordania, Arabia Saudite, Iraku, Libani, Egjipti, Emiratet e Bashkuara Arabe, Bahreini dhe Katari u takuan për të diskutuar.

Siç raportohet, në tavolinë nuk kishte asnjë përfaqësues sirian.

Diplomatët arabë u takuan më parë dhe lëshuan një deklaratë duke bërë thirrje për një tranzicion politik paqësor dhe gjithëpërfshirës që çon drejt zgjedhjeve dhe një kushtetute të re për Sirinë.

Ministrat thanë se ishin të përkushtuar për të luftuar terrorizmin, të cilin ata e quajtën një kërcënim për sigurinë në Siri, rajon dhe botë.

Ndryshe, Turqia dhe SHBA-ja, të dyja anëtare të NATO-s, kanë interesa konfliktuale kur bëhet fjalë për disa prej rebelëve.

Rebelët e mbështetur nga Turqia në Sirinë veriore janë përleshur me Forcat Demokratike Siriane (SDF) të udhëhequra nga kurdët.

SDF, e cila kontrollon disa nga fushat më të mëdha të naftës në Siri, është aleati kryesor në një koalicion të SHBA-së kundër militantëve të Shtetit Islamik.

Ai drejtohet nga milicia YPG, një grup që Ankaraja e sheh si një zgjatim i militantëve të Partisë Punëtore të Kurdistanit (PKK) që kanë luftuar kundër shtetit turk për 40 vjet. /Telegrafi/