Diell dhe kthjellime, parashikimi i motit për javën në Shqipëri

Meteorologu Hakil Osmani deklaroi sot se gjatë kësaj jave, territori shqiptar do të karakterizohet nga vjeshta tipike.

Në emisionin “Good Morning Albanians” në Euronews Albania, Osmani u shpreh se deri të premten, do të ketë kthjellime dhe orë të shumta me diell.

Ndërsa, në fundjavë, do të ketë shpeshtim të vranësirave dhe reshje të pakta shiu në zonat malore.

“Pritet që gjatë kësaj jave të kemi vjeshtën tipike në territorin shqiptar. Do kemi temperatura të cilat në zonat malore do të jenë relativisht të freskëta, 4-5 gradë Celcius pritet të jenë temperaturat në qytetet e zonave malore. Në ultësirën perëndimore do të luhaten në 9-13 gradë Celcius”, tha ai.

“Përsa i përket orëve të mesditës, parashikohet që maksimumet në qytetet e zonave malore të luhaten në 17-18 gradë Celcius, ndërsa në zonën e ulët, duke përfshirë edhe kryeqytetin, parashikohet që maksimumet të luhaten në 21-22 gradë Celcius. Sa i përket kushteve atmosferike, deri të premten do të jemi në dominimin e kthjellimeve, orëve të shumta me diell. Në fundjavë, parashikohet që të kemi shpeshtim të vranësirave, ku në zonat malore pritet të kemi edhe reshje të pakta shiu”, theksoi Osmani. /Euronews Albania/