Trajtim i thjeshtë për buzë të lëmuara dhe të hidratuara
Të gjithë dëshirojmë të dukemi sa më mirë dhe të ndjehemi rehat me pamjen tonë, ndërsa buzët janë një nga detajet që shpesh i japin fytyrës më shumë hijeshi. Por, tharja, plasaritja apo pamja e zbehtë e tyre mund të jenë problem i zakonshëm, sidomos gjatë stinëve të ftohta apo kur nuk konsumojmë mjaftueshëm ujë.
Në vend të balsameve me kimikate, mund të përgatisni vetë një scrub natyral që i lë buzët të buta, të lëmuara dhe më të ushqyera. Kjo recetë kombinon dy përbërës të zakonshëm, por shumë efektivë: kafenë e bluar dhe mjaltin e papërpunuar.
Pse pikërisht kafe dhe mjaltë?
Kafeja vepron si eksfoliant natyral. Kokrrizat e imëta heqin qelizat e vdekura nga sipërfaqja e buzëve dhe stimulojnë qarkullimin e gjakut, duke u dhënë atyre një ngjyrë më natyrale dhe pamje më të freskët.
Mjalti është një hidratues natyral. Ai zbut, ushqen dhe ndihmon në rigjenerimin e lëkurës së ndjeshme të buzëve. Për më tepër, vepron edhe si antibakterial natyral, transmeton Telegrafi.
Si ta përgatisni pastën në shtëpi
Do t’ju duhen:
▪ ½ lugë çaji kafe e bluar (mundësisht kafe organike)
▪ ½ lugë çaji mjaltë natyral
Përziejini mirë të dy përbërësit derisa të formohet një pastë. Me lëvizje të lehta rrethore, aplikojeni përzierjen në buzë duke i masazhuar për rreth 30 sekonda deri në një minutë. Më pas, shpëlajini buzët me ujë të vakët dhe aplikoni një balsam natyral ose vaj kokosi për t’i mbrojtur.
Këshillë shtesë
Mund ta përsërisni këtë trajtim 1-2 herë në javë.
Për rezultate edhe më të mira, pini ujë mjaftueshëm çdo ditë dhe shmangni lëpirjen e buzëve, pasi kjo i than edhe më shumë.
Për një aromë relaksuese, mund t’i shtoni një pikë vaj esencial menteje ose limoni.
Ky ritual i thjeshtë mund t’i kthejë buzëve butësinë dhe shkëlqimin që i mungon, pa pasur nevojë për produkte të shtrenjta. Kujdesi natyral është shpesh zgjedhja më e mirë! /Telegrafi/
