Deputetët të pranishëm në sallë, seanca pritet të fillojë në orën 15:00

14:15: (E përditësuar) – Seanca në Kuvend në të cilën duhet të diskutohet për propozimin për ndryshimin e Kushtetutës, do të fillojë në orën 15:00, ndërsa arsye për këtë vonim thuhet të jenë diskutimet brenda shumicës parlamentare për të siguruar dy të tretat e votave të deputetëve.

Nga Kuvendi zyrtarisht thonë se arsye për shtyrjen e fillimit të seancës është mungesa e deputetëve në sallë.

———————–

Në Kuvendin e Maqedonisë të pranishëm janë pjesa më e madhe e deputetëve, si dhe kryeministri Zoran Zaev.

Zyrtarisht nuk është dhënë asnjë arsye pse po vonohet fillimi i seancës, e cila është dashur të nis në orën 12:00, përcjell Telegrafi Maqedoni.

Në sallë ku mbahet seanca plenare në vendet e tyre janë deputetët e koalicionit të LSDM-së, një pjesë e deputetëve të BDI-së, ndërsa në korridorin e Kuvendit janë një pjesë e deputetëve të OBRM-PDUKM-së.

Përndryshe, disa media maqedonase para fillimit të seancës raportuan se shumica parlamentare ka arritur së sigurojë dy të tretat e votave të deputetëve, të cilat janë të nevojshme për të votuar ndryshimet kushtetuese.

Deputeti i OBRM-PDUKM-së Sasho Vasilevski, i cili ka qenë në burg shtëpiak pasi është i dyshuar për ngjarjet e 27 prillit, tha se nuk e di nëse do të votojë për propozimin e qeverisë për të ndryshuar Kushtetutën e vendit.

Ai tha se në parti ka pasur takim koordinues dhe se kur të vijë koha e votimit, opinioni do të mësojë se çfarë kanë vendosur./Telegrafi/