Deputetët evropian ofrojnë ndihmën dhe mbështetjen e tyre për Republikën e Maqedonisë

Kryetari i Kuvendit të Republikës së Maqedonisë, Talat Xhaferi sot realizoi takim me deputetët evropian Ivo Vajgl, Knut Fleckenstein dhe Eduard Kukan.

Në këtë takim me përfaqësues të Parlamentit Evropian, Xhaferi ka informuar deputetët evropian për gjendjen aktuale politike në vend, për aktivitetet e Kuvendit tv RM në lidhje me Planin 3-6-9, rekomandimet e Pribes, Raportin e Komisionit anketues për ngjarjet e 24 dhjetorit të vitit 2012, si dhe për reformat që do të ndërmerren në sferën e integrimeve euro-atlantike të Republikës së Maqedonisë, përcjell Telegrafi Maqedoni.

Xhaferi poashtu ka theksuar rëndësinë e krijimit të marrëdhënieve të mira ndër fqinjësore, për të cilën e përmendi nënshkrimin e Marrëveshjes për miqësi, fqinjësi të mirë dhe bashkëpunim me Republikën e Bullgarisë dhe vizitën e sotme të Ministrit për punë të jashtme të Greqisë, thuhet në kumtesën e Shërbimit për shtyp të Kuvendit.

Deputetët evropian kanë përshëndetur funksionimin normal të institucioneve shtetërore në Maqedoni, si dhe stilin dhe konceptin e ri të punës së Kuvendit, me çka i kthehet dinjiteti i institucionit Kuvend i Republikës së Maqedonisë, duke shtuar se në Parlamentin Evropian mbisundon atmosferë pozitive dhe ata e ofrojnë ndihmën dhe mbështetjen e tyre për afrimin e demokracisë së re të Maqedonisë drejt strukturave evropiane dhe krijimin e atmosferës së kompromisit ndërmjet partive të ndryshme politike në vend për përmbyllje të problemeve të tranzicionit./Telegrafi/