“Demokracia Studentore” proteston në Ferizaj: Punësime partiake, të shkarkohet Rektori (Video)

“Demokracia Studentore” ka protestuar sot para Universitetit të Shkencave të Aplikuara në Ferizaj, duke kërkuar dorëheqjen e Rektorit. Ata akuzuan se ky institucion është mbushur me punonjës partiakë.

Posa deshën të futen brenda oborrit të Universitetit Publik në Ferizaj, studentët u ndeshën në punëtorët e sigurimit fizik të  këtij institucioni.

Përkundër rezistencës, pjesëtarë të organizatës Demokracia Studentore u futën me dhunë brenda, duke thyer edhe derën.

Mexhid Ramusa, kryetari i organizatës “Demokracia Studentore”, duke kërkuar dorëheqjen e rektorit, tha se ky universitet është mbushur me punonjës partiakë.

Ai gjithashtu u shpreh i mllefosur që po i mbajnë të mbyllur studentët brenda, për të mos i lejuar t’i bashkëngjiten protestës.

“I kanë mbyllur dyert për të mos i lënë studentët të dalin jashtë. Këtu dallohet që Rektori po e mban këtë Universitet me dhunë… Këtu janë të punësuar familjarë të Hashim Thaçit – dy djem të mixhës së tij, nipi i Azem Sylës, Sejdi Hoxha – kryeshef ekzekutiv, edhe ai nuk vjen kurrë”, tha Mexhid Ramusa.

Kësaj proteste i doli në përkrahje edhe Driton Ismajli nga shoqëria civile.

“Ne po kërkojmë që ky universitet të funksionojë në baza dhe kurrikula arsimore, e jo në bazë të ligjeve që këta i bëjnë vet. Agron Bajraktari është një person i kapur politikisht dhe anëtar i PDK-së. Ai po mundohet që të politizojë edhe këtë universitet”, tha Ismajli.

Në fund të protestës ata patën edhe një aksion simbolik.

Pastaj u përballën edhe me policinë, për dëmet që bënë.

Rektori i këtij universiteti, Agron Bajraktari, i telefonuar nga RTV Dukagjini, tha se nuk do të prononcohet lidhur me akuzat dhe kërkesat e protestuesve. Pas përfundimit të protestës, në oborr dolën edhe studentët./RTV Dukagjini/Telegrafi/