Delawie: Dogana e Kosovës duhet ta luftojë korrupsionin

Është mbajtur takimi i 4-të nivelit të lartë për sundimin e ligjit, ku në fokus ishte puna e Doganave të Kosovës.

Kryeministri, Ramush Haradinaj, tha se Qeveria e Republikës së Kosovës është e përkushtuar në rrugën e saj për Sundimin e ligjit dhe shpreh mbështetjen e saj në këtë drejtim.

Ai veçoi se vetëm një veprim ndërinstitucional mund të sjellë suksese në përpjekjen e përbashkët për sundim të ligjit.

Për ambasadorin Amerikan në Prishtinë, Greg Delawie, Dogana e Kosovës duhet të vazhdojë me luftimin e korrupsionit dhe krimit të organizuar dhe se duhet vazhduar me reforma dhe me koordinim të punëve me akterë të tjerë për sundimin e ligjit.

Ndërkaq, shefja e Zyrës së BE-së në Kosovë, Nataliya Apostolova tha se Bashkimi Evropian është donatori dhe partneri më i madh i vendit, në rrugën e tij për sundim të ligjit.

Drejtori i Doganave të Kosovës, Bahri Berisha tha se projeksioni i institucionit që ai drejton është që në vitin 2018-të, të ketë të hyra prej 1.175 miliardë euro, derisa 65 për qind e të gjitha taksave në Kosovë, grumbullohen nga Dogana. Ndër sfidat e funksionimit të këtij institucioni u përmend krijimi i një njësie të përbashkët kombëtare të Inteligjencës dhe caktimi i Prokurorëve dhe Gjyqtarëve të veçantë për çështjet e Doganës.

Ministri i Financave, Bedri Hamza, ka thënë se Doganat e Kosovës e kanë mbështetjen e plotë në punën e tyre. Ai tregoi se është ndarë buxhet për ndërtimin e objektit të ATK-së dhe Doganës.

Po ashtu, Hamza tha se ky institucion duhet të ketë parasysh që në pozitat udhëheqëse të vendosen persona në bazë të meritokracisë.

Nga ana tjetër, ministri i Drejtësisë, Abelard Tahiri, përmendi faktin që Avokatura Shtetërore aktualisht nuk po arrin t’i shqyrtojë të gjitha lëndët që kanë të bëjnë me Doganat, të cilat arrijnë shifrën prej 3260 lëndë dhe se në këtë drejtim po punohet që vetë Dogana t’i krijojë kapacitetet e saj për t’i trajtuar ato.

Takimi i radhës, i nivelit të lartë për Sundim të Ligjit do të mbahet pas një muaji, ndërkaq në fokus do të ketë punën e Prokurorisë dhe sfidat që e përcjellin./Telegrafi/