Deklaratë e përbashkët për zgjedhje fer dhe demokratike nga forumet rinore në Maqedoni

Të rinjtë u zotuan për fushatë dinjitoze dhe uljen e nivelit të gjuhës së urrejtjes, zhvillim të procesit zgjedhor demokratik dhe garë të barabartë duke respektuar çdo pjesëmarrës në procesin zgjedhor, përcjell Telegrafi Maqedoni.

“Politikanët e rinj çdo vit kanë rol më të madh dhe zë më të fuqishëm  në shoqëri dhe në proceset politike, si asnjëherë më parë politikanët e rinj janë të përfaqësuar në pothuajse çdo listë të këshilltarëve, të rinjtë janë partnerë kyç të vendimmarrësve dhe partnerë strategjikë dhe do të vazhdojnë me forca të përbashkëta të krijojnë politika me rëndësi kyçe për të rinjtë”, deklaroi Biljana Janeva nga Instituti “Ohri”.

Ndërsa Marija Andreva tha se synimi i deklaratës është të motivohen të rinjtë e partive politike për përpjekje më të mëdha në kuadër të zhvillimit të kampanjave zgjedhore fer dhe demokratike, dhe të dëshmojnë se të rinjtë si pjesë e rëndësishme e të gjitha partive politike bartin përgjegjësi dhe me maturi të japin kontribut në përforcimin e demokracisë në Republikën e Maqedonisë./Telegrafi/