Deklaratat e Edi Ramës për dosjen Xibraka, reagon Gazment Bardhi: Boll u fshehe

Kreu i Grupit Parlamentar të Partisë Demokratike, Gazment Bardhi, ka reaguar pas deklaratave të kryeministrit Edi Rama për dosjen ‘Xibraka’.

Përmes një postimi në Facebook, Bardhi është shprehur se përpjekja e dëshpëruar e Ramës për të diskredituar punën e SPAK, është tregues i formimit të tij që mendon se institucionet e drejtësisë janë zyra propagande qeveritare.

Lexo po ashtu Çështje e Xibrakës, Olsi Rama padit sërish në SPAK Gazment Bardhin

Bardhi gjithashtu i kërkon Ramës që të mos fshihet pas letrave të vëllait më të vogël, që sipas tij janë të pavlera, duke iu referuar kërkesës së Olsit në SPAK për këtë çështje.

Reagimi i Gazment Bardhit:

Vëllai i madh i Olsit, Edi Rama, është i lumtur për rihapjen e dosjes “Xibraka”, po aq sa ishte Erion Veliaj kur doli pas 8 orëve nga SPAK! Përpjekja e tij e dëshpëruar për të diskretituar SPAK, duke e urdhëruar nga TV se çfarë duhet të bëjë dhe sesi duhet ta trajtojë këtë çështje, është tregues i formimit të tij prej analfabeti ligjor që mendon se institucionet e drejtësisë janë zyra propagande qeveritare.

Në mëngjes vëllai i vogël ripërsërit të njëjtën kërkesë në SPAK që është rrëzuar më parë, me shpresën se do i jap oksigjen për gënjeshtrën ditore të darkës vëllait të madh, që i ikën të vërtetës prej më shumë se 2 muaj. Boll u fshehe pas letrave pa vlerë të vëllait më të vogël! Na trego çfarë bënte yt vëlla me makinën që përdorte grupi i kokainës me targa AA 653 DM. Sado të përdridhesh nuk e fsheh dot të vërtetën dhe as makinën e kartelit të drogës me targë AA 653 DM, e përdorur nga Olsi Rama!