Deklarata e “kuvendit gjithëserb”, Hill: E ardhmja paqësore e Ballkanit të mbetet në fokusin e të gjithëve

Ambasadori amerikan në Beograd, Christopher Hill, tha të martën se Serbia ka rol për të luajtur për një të ardhme paqësore në Ballkanin Perëndimor, pas një Deklarate të përbashkët mes liderëve të Serbisë dhe të entitetit serb të Bosnje e Hercegovinës – Republika Srpska (RS).

“Të gjithë të cilëve iu intereson për Serbinë dhe të ardhmen e saj, duhet të përqendrohen në krijimin e një të ardhme paqësore dhe të begatë për tërë Ballkanin Perëndimor, duke e rritur bashkëpunimin rajonal, me integrimin në BE si synimin përfundimtar”, tha Christopher Hill për REL-in.

Hill iu përgjigj pyetjeve të REL-it në lidhje me Deklaratën të ashtuquajturën Deklaratë për mbrojtjen e të drejtave kombëtare dhe politike dhe të ardhmërisë së përbashkët të popullit serb, të miratuar në seancën e përbashkët të Qeverisë së Serbisë dhe RS-së më 8 qershor.

“Kuvend gjithëserb” u mblodh të shtunën në Beograd, ku udhëheqës të Serbisë dhe të Republikës Srpska, bënë thirrje për unitetin e serbëve në të gjithë rajonin. Ai u organizua nën sloganin “Një popull, një kuvend – Serbia dhe Srpska”.

Të hënën, Ambasada e Shteteve të Bashkuara në Sarajevë tha se Deklarata e përbashkët mes Serbisë dhe Republika Srpska buron nga dezinformatat ligjore dhe është e mbushur me plot gabime.

Lexo po ashtu SHBA "shuplakë" Dodikut dhe Vuçiqit: Deklarata “gjithëserbe” sulm i rrezikshëm ndaj Dejtonit dhe institucioneve të Bosnjës

Në një postim në rrjetin social X, Ambasada amerikane tha se “deklarata nuk përbën mbrojtjen e Marrëveshjes së Dejtonit për Paqe, siç pretendojnë autorët, por është sulm i qëllimshëm ndaj kësaj marrëveshjeje dhe ndaj institucioneve të Bosnje e Hercegovinës. Kjo është e rrezikshme”.

Në Deklaratën e tyre të përbashkët është përmendur edhe Kosova.

Lexo po ashtu Hovenier për deklaratën e Serbisë dhe Republikës Srpska: S’është qëndrimi ynë

Përveç pjesës për emrin, në Deklaratë përmendet edhe që Kosova “është pjesë e patjetërsueshme e Serbisë”, dhe që “kuvendi gjithëserb” mbështet përpjekjet e Republikës së Serbisë për ruajtjen e integritetit territorial dhe sovranitetit, të garantuar me ligjin ndërkombëtar, Rezolutën 1244 dhe rezolutat tjera të Këshillit të Sigurimit të Kombeve të Bashkuara.