DASH: Shqipëria, përkrahëse në luftën kundër terrorizmit

Kërcënimi mbarëkombëtar prej terrorizmit po bëhet gjithnjë e më shumë i decentralizuar, teksa grupe të tilla si Shteti Islamik po përhapin tentakulat në rajone të ndryshme, përfshi Azinë Juglindore, Kaukazin Verior të Rusisë dhe Afrikën, bën të ditur Departamenti amerikan i Shtetit në raportin më të fundit të përvitshëm të publikuar mbi terrorizmin.

E ndërsa Al-Qaeda, Boko Haram dhe al-Shabab vazhdojnë të kryejnë sulme destabilizuese, sipas DASH, Shteti Islamik mbetet kërcënimi më i madh global që prej vitit të kaluar, me një forcë “të jashtëzakonshme” në Siri dhe në Irak.

Departamenti i Shtetit liston afro 60 grupe të huaja terroriste, të konsideruara prej Shteteve të Bashkuara, në raportin e tij më të fundit, duke përcaktuar madje edhe shtete të veçanta si aktorë “të këqinj” në luftën globale antiekstremizëm.

Mes tyre janë Irani, Sudani dhe Siria, ndërsa DASH jep edhe një listë prej 45 shtetesh që kanë miratuar ose kanë përditësuar ligje të reja në lidhje me përballjen ndaj luftëtarëve të huaj. Sipas raportit, 35 vende kanë arrestuar të tillë luftëtarë, ndërsa 12 shtete “kanë hetuar me sukses” të paktën një luftëtar të huaj gjatë vitit të kaluar.

Në kapitullin për Shqipërinë thuhet se vendi ynë ka qenë një përkrahës i përpjekjeve kundër terrorizmit për vitin 2015, ndërsa ka vijuar pjesëmarrjen në koalicionin global të udhëhequr prej SHBA-ve në luftën kundër ISIL (Shtetit Islamik në Irak dhe Levant), duke dhuruar një sasi të konsiderueshme armësh dhe municioni për forcat peshmerga në Irak.

DASH, në raportin për vitin 2015 vlerëson legjislacionin shqiptar, i cili parashikon dënime të ashpra për aktet e terrorizmit, financimin e tij, grumbullimin, transferimin dhe fshehjen e fondeve që financojnë terrorizmin, si dhe transaksionet me personat e listuar si të sanksionuar nga OKB-ja. Por edhe për rekrutimin dhe stërvitjen e personave për ndërmarrjen e akteve terroriste, sikurse edhe për ngritjen, udhëheqjen apo pjesëmarrjen në organizata terroriste.

E vetmja notë negative e këtij raporti është korrupsioni, që sipas DASH, i kombinuar me një sistem drejtësie që funksionon dobët, vazhdon të pengojë përpjekjet për vendosjen e rendit në të gjitha nivelet në Shqipëri.

Sa i përket Kosovës, DASH thotë se kërcënimi i ekstremizmit të dhunshëm islamik është rritur gradualisht që prej konfliktit të vitit 1999, nxitur pjesërisht prej financimit nga organizatat e huaja që predikojnë idelogji ekstremiste. Rreth 250 luftëtarë të huaj terroristë nga Kosova, kanë udhëtuar në Siri dhe Irak për të luftuar përkrah ISIS ose Frontit al-Nusra, prej të cilëve janë vrarë 50 vetë.