CS:GO vazhdon të thyejë rekorde pak para fillimit të Majorit të fundit

Një rekord i ri i lojtarëve të njëkohshëm në video-lojën e CS:GO është vendosur pak para fillim të Majorit të fundit në Paris.

Gjatë gjithë vitit 2023, CS:GO ka vazhduar me organizime të ndryshme, ndërsa vazhdon të tejkalojë rekordet e lojtarëve herë pas here.

Para këtij viti, kulmi i mëparshëm i lojtarëve të njëkohshëm ishte vendosur menjëherë pas goditjes së pandemisë COVID-19 në prill 2020, kur pak më shumë se 1.3 milion lojtarë ishin në lojë në të njëjtën kohë.

Në shkurt 2023, u vendos një rekord i ri me mbi 1.35 milionë lojtarë të njëkohshëm dhe ky numër ka vazhduar të rritet.

Në mars, CS:GO arriti shifrën 1.5 milion për herë të parë dhe në prill theu gjithashtu rekordin mesatar të lojtarëve nga tre vjet më parë, duke tejkaluar pragun e 900.000, shkruan HLTV.

Ndërsa më 6 maj, para Majorit të fundit në CS:GO në Paris është vendosur një rekord i ri astronomik.

Ky numër tani është në 1.802,853 lojtarë të njëkohshëm sipas Steamcharts, gati 300.000 më shumë nga rekordi i mëparshëm i marsit.

Mbetet të shihet a do të thyhet ky rekord përsëri gjatë Majorit në Paris, pasi këtë verë do të lansohet versioni i ri i lojës – Counter Strike 2. /Telegrafi/