Brendi Faraday Future do të provojë sërish në tregun automobilistik me një furgon elektrik të ri, i cili ndër të tjera dallon për ekranin LED në vend të grillës tipike frontale.
Në brendësi të veturave po dominojnë gjithnjë e më shumë ekranet digjitale të mëdha, dhe kjo nuk është më ndonjë lajm i ri. Modelet më të fundit premium tashmë kanë deri në tri ekrane në pjesën e përparme, ndërsa disa prej tyre kanë edhe për pasagjerët në ulëset e pasme.
Në momentin kur menduam se ishte arritur kufiri, tani disa prodhues kanë fokusuar vëmendjen tek dizajni i jashtëm. Nuk e dimë se si do të jetë reagimi i publikut, apo nëse do të shitet në fund, por Faraday Future është brendi i parë që guxoi të sjellë në treg një automjet me ekran digjital në pjesën e përparme.
Kjo u bë në prezantimin e modelit të ri FX Super One, një furgon 100 për qind elektrik, i mbajtur në Los Angeles, me të cilin kompania do të bëjë përpjekjen e dytë në tregun e Amerikës së Veriut. Kujtojmë se brendi nuk pati sukses me modelin FF 91, pasi u shitën vetëm rreth 20 automjete, dhe që pas shtatë viteve pritje nga prezantimi në 2017, nisi shpërndarjen.
Financimi kinez është çelësi për mbijetesën e Faraday Future, i cili ishte afër falimentimit, ndërsa prezantimi i këtij minivani/kombi elektrik me teknologji të lartë mund të japë një impuls të domosdoshëm kompanisë.
E vërteta është se dimë pak për këtë FX Super One, i cili tashmë mund të porositet në faqen e tij zyrtare. Detajet kryesore mekanike janë të panjohura, përveç që do të jetë 100 për qind elektrik dhe premton një brendësi të hapur, fleksibël dhe modulare me deri në 7 ulëse.
Por, siç përmendëm, veçoria më dalluese është dizajni i jashtëm, veçanërisht pjesa e përparme. Në vend të grillsë tradicionale, Faraday ka vendosur një ekran të madh LED të quajtur FACE (Front AI Communication Ecosystem).
Ky mund të ofrojë shumë funksione, si projektimi i animacioneve, imazheve, videove, mesazheve për kalimtarët, apo edhe të shërbejë si billboard lëvizës. Gjithashtu, është i aftë për komunikim zanor kur automjeti është i parkuar.
Ata nuk treguan se si do të adresohen disa nga çështjet që kjo inovacion sjell: A do të jetë rezistent ndaj goditjeve? A do të ketë ndonjë lloj mbrojtjeje speciale? A do të mund të transmetojë reklama lirshëm?
Kjo nuk është hera e parë që shohim një teknologji të tillë, por është e para që prezantohet në një automjet që pritet të prodhohet në masë. Kemi parë propozime nga marka të tilla si Hyundai, Opel dhe BMW, por gjithmonë si prototipe dhe me fokus në dërgimin e mesazheve ose sinjaleve vizuale për këmbësorët.
Duket se Faraday po shkon më tej dhe ka punuar për të krijuar një automjet më të përballueshëm për publikun e gjerë, duke ruajtur njëkohësisht karakterin premium dhe familjar. Ai do të ofrohet me motor elektrik ose motor me shtrirje rreze, me të gjitha rrotat aktive, dhe me inteligjencë artificiale si pjesë qendrore e brendësisë, me teknologji LiDAR, sensorë ultrasonikë dhe kamera me rezolucion të lartë.
Ekspertët sugjerojnë se ky automjet mund të jetë një version i ri i Wey Gaoshana nga kompania kineze Great Wall Motors. Por, siç thamë, detajet e dhëna nga kompania amerikane janë të pakta. Gjithashtu, është përmendur se çmimi i tij do të jetë trefish më i ulët se ai i hiperautomjetit FF 91. Pritet që FX Super One i ri të kushtojë më pak se 100 mijë euro. /Telegrafi/
