City përgatitë ofertë të parefuzueshme si për Haalandin ashtu edhe për Borussia Dortmundin

Erling Haaland është njëri nga sulmuesit më të kërkuar në Evropë.

Ylli norvegjez ka shkëlqyer me fanellën e Borussia Dortmund dhe është objektiv i skuadrave më të mëdha evropiane.

Chelsea, Real Madrid, Manchester United, Juventus, Barcelona e Paris Saint Germain janë disa nga skuadrat e interesuara.

Por së fundmi fuqishëm në garë është futur edhe lideri aktual i Ligës Premier, Manchester City.

Mediat angleze kanë raportuar se City është duke përgatitur një ofertë shokuese si për lojtarin ashtu edhe për Borussia Dortmund.

Haaland ka një klauzolë largimi prej 70 milionë eurove, por ajo futet në fuqi vetëm në vitin 2022.

Kësisoj City është duke dashur transferimin e tij në verë për ta zëvendësuar Kun Agueron që pritet të largohet si lojtar i lirë.

Manchester City është gati t’i ofrojë plot 114 milionë euro Dortmundit për transferimin e norvegjezit.

Nga ana tjetër për lojtarin është bërë gati një kontratë që nuk mund të refuzohet aq lehtë.

City është gati t’i ofrojë kontratë pesë vjeçare norvegjezit me pagë prej 500 mijë eurove në javë, apo dy milionë euro muaji që do ta bënte atë njërin nga lojtarët më të paguar në botë.

Në rast se pranon ofertën e Cityt, Haaland do të ketë një pagë vjetore prej 24 milionë eurove në vit, pa përfshirë bonuse të ndryshme.

20-vjeçari është një makinë e golave, ku në 21 ndeshje zyrtare ka shënuar 22 gola dhe ka asistuar në pesë të tjerë. /Telegrafi/