Cili telefon është më i shpejtë – Nothing Phone (2) apo iPhone 14 Plus?

Kanali PhoneBuff në YouTube krahasoi iPhone 14 Plus dhe Nothing Phone të ri (2) në shpejtësinë e punës së aplikacioneve të ndryshme.

Youtuberët përdorën një krah robotik për të arritur një krahasim më të saktë, duke eliminuar ndikimin e faktorit njerëzor, transmeton Telegrafi.

Telefonat inteligjentë përdornin vazhdimisht një sërë aplikacionesh dhe lojërash, me Nothing Phone (2) që performonte pak më mirë se modeli më i shtrenjtë iPhone 14 Plus në këtë krahasim.

PhoneBuff beson se konkurrenti kryesor i Nothing Phone (2) është telefoni iPhone 14 Plus, andaj i kanë krahasuar dy modelet, me çmimin e ri Nothing që në treg fillon me 649 euro dhe modeli në video që është përdorur për këtë test është Phone (2) 12+256 GB çmimi i të cilit është 729 euro.

Nga ana tjetër, iPhone 14 Plus tashmë është një vjeçar i Apple, i cili aktualisht mund të blihet me një çmim të rregullt prej rreth 1290 euro, përkatësisht modeli 128 GB që është përdorur në test.

Pra diferenca e çmimeve në tregun evropian është më e madhe se në tregun amerikan dhe çmimet e përmendura në video.

Nothing Phone (2) e përfundoi këtë test i pari, me një kohë 2:50, dhe iPhone gjashtë sekonda më vonë. Në jetën reale, një ndryshim i tillë ndoshta nuk është i dukshëm, por tregon se inxhinierët e markës relativisht të re Nothing bënë një punë të mirë me pajisjen.

Është gjithashtu e rëndësishme të përmendet se Nothing Phone (2) përdor procesorin Snapdragon 8 Plus Gen 1, i cili dikur konsiderohej lider, dhe tani është Snapdragon 8 Gen 2. Megjithatë, edhe me atë çipin më të vjetër, ai arriti të fitojë këtë test shpejtësie.

Çipi që fuqizon iPhone 14 Plus është A15 Bionic i vetë Apple. Duhet të theksohet se pajisja Nothing ka dy herë më shumë RAM: 12 GB kundrejt 6 GB për iPhone 14 Plus.

Në të kaluarën, falë optimizimeve që sjell iOS, iPhone-ët pothuajse gjithmonë kanë mposhtur konkurrentët e tyre kryesorë Android, pavarësisht nga RAM-i.

“Të fitosh teste të tilla shpejtësie kundër iOS është një arritje e vërtetë”, “u befasova vërtet nga performanca e Nothing Phone 2 para se të shikoja videon mendova se do të fitonte iPhone 14 plus”, “mbresëlënëse”, “performanca shumë mbresëlënëse e Nothing Phone 2 që është më i lirë se iPhone 14 Plus”, janë disa nga komentet poshtë videos. /Telegrafi/