Lajme Kosovë

Cilat ishin mesazhet e shefit të CIA-s në Kosovë, flasin analistët

Para 6 muajve

Vizita e shefit të CIA-s, William Burns në Kosovë po konsiderohet të jetë mesazh për autoritetet vendore. Analistë e ekspertë të fushës theksojnë se drejtuesi i inteligjencës amerikane ka kërkuar qasje serioze në zbatimin e asaj çfarë kërkohet tash e sa vjet nga Shtetet e Bashkuara të Amerikës. Sipas tyre, shefi i ekzekutivit do të ndryshojë qasje në raport me partnerët ndërkombëtarë.

Profesori universitar dhe politologu, Dritëro Arifi thotë se vizita e shefit të CIA-s në Ballkan, është porosi që të mos lejohet ndikimi i shteteve të treta, si Rusia e Kina.

“Vizita e shefit të CIA-s në një kohë kaq turbulente, jo vetëm në rajon, por zakonisht në skenën e marrëdhënieve ndërkombëtare dëshmon që mesazhet diplomatike që i ka dhënë State Departament për Kosovën që tri vjet e gjysmë kanë dështuar. Kjo është masa e fundit që çka duhet të zbatohet dhe kur të zbatohet. Shefi i CIA-s vjen vetëm me direktiva, nuk besoj që ka ardhur me i pyet se si i kanë kaluar pushimet, pra është takim i cili kërkon qasje serioze dhe qasje të limituar për të zbatuar diçka, për diçka çfarë ka kërkuar ShBA për tri vjet…Ajo çfarë mund të supozojmë është që Qeveria e Kosovës ka disa detyra për të cilat është zotuar se do i bëjë. Mos zbatimi i këtyre obligimeve të marra në një far forme apo tjetër, po e rrezikon sigurinë ose po e cenon sigurinë dhe politikën e jashtme amerikane”, deklaron ai për Kosovapress.

Nga vizita i shefit të CIA-s, Arifi thotë se kërkohet zbatim e në të kundërtën sanksionim.

“Nuk ka më hapësirë për interpretim. Kjo vizitë si në Bosnje edhe në Serbi por edhe në Kosovë varësisht nga kërkesat e ShBA-ve nuk len hapësirë për interpretim, që i bie i duhet të zbatohet ajo çfarë është kërkuar nga ShBA-ja. Po e përmendi vetëm një histori të shkurtër, janë tri shtete të cilat në raste të tilla ku shefi i CIA-s i ka vizituar shtetet, ka qenë Pakistani, Turqia dhe Afganistani. Të tria kanë pasur çështje të ndryshme, Pakistani për mos luftimin e terrorizmit dhe mandej është sanksionuar për çështje të sigurisë, Turqia për blerjen e raketave ruse dhe është sanksionuar me mos blerjen e raketave F35 nga ShBA-të dhe rasti i fundit i Afganistanit që është shumë më i freskët ku qeveria afgane ka hezituar dhe nuk ka qenë fleksibile për të ndërtuar qeveri gjithëpërfshirëse. Sanksionet i dimë në Afganistan janë më tragjiket”, shton ai.

Se shefi i CIA-s ka ardhur me mesazhe të qarta, e thotë edhe analisti nga Shqipëria, Ben Andoni, i cili shton se shteti ka para vetës sfida.

“Zotëri Kurti jo që do i marrë parasysh (porositë), po besoj që do ta ulë kokën shumë shpejt para shumë, shumë gjërave që autoritetet amerikane do i kërkojnë atij…në momentet kur autoritetet amerikane, si në rastet e fundit me Urën e Ibrit që ju e dinë shumë mirë që është ura tjetër 200 metra më pas që funksi0onon, por edhe në rastet e postave që gjithsesi i kërkoi të ishte pak më i durueshëm, unë mendoj që zotëri Kurti do të jetë shumë i kujdesshëm tani e tutje me veprimet e tij. Pa çka që atij i duhen pikët për gjërat politike, duket që jo vetëm BE por edhe ShBA-të kanë nevojë për një Serbi shumë neutrale. Duket që po ia shkëpusin aleatët Rusisë pak e nga pak dhe kjo është mënyra se si dobësohet një armik kaq potencial, kaq sfidues siç është Rusia”, shprehet Andoni.

E eksperti i sigurisë në Shqipëri, Faik Basha konsideron se vizita e drejtuesit të inteligjencës amerikane do e ndihmojë vendimmarrjen amerikane për të krijuar ide më të qartë për situatën në rajon.

“Vizita e drejtuesit të inteligjencës amerikane në Kosovë është më shumë në drejtim të dhënies së mesazhit që Shtetet e Bashkuara nuk e kanë hapur rëndësinë dhe nuk ndikohen nga veprimet e një qeverie apo një tjetre, por ato e kanë marrëdhënien me popullin e Kosovës dhe qëndrimi dy ditor është një mesazh tepër i rëndësishëm për të treguar që Kosova është nën mbikëqyrjen dhe nën mbështetjen e padiskutueshme të Shteteve të Bashkuara të Amerikës. Unë e lexoj kështu këtë vizitë. Takimi me Kurtin dhe me presidenten Osmani, takimi me kreun e inteligjencës së Kosovës, sigurisht që iu ka shërbyer për të shkëmbyer informacionet që mund t’i quajmë sekret dhe mendoj që ka qenë tepër e nevojshme një vizitë e tillë, pasi kemi parë deklarata të zëdhënësve të Bashkimit Evropian të cilët për mendimin tim e kanë cenuar sovranitetin e Republikës së Kosovës”, thotë Basha.

Ish-gjenerali i Forcës së Sigurisë së Kosovës, Afrim Veseli thekson se kohëve të fundit ShBA-të, kanë kundërshtuar vendimet e institucioneve të vendit.

“Kohëve të fundit kemi qenë dëshmitarë të disa përçarjeve mes Kosovës dhe Amerikës për një këmbëngulësi lidhur me hapjen e Urës së Ibrit. Shtetet e Bashkuara të Amerikës nuk janë kundër mos hapjes së urës por është kërkesë e tyre që ajo të realizohet në një situatë pak më të volitshme. Marrë parasysh se situata e sigurisë në Ballkan, në Evropë edhe në përgjithësi në botë është tejet e tensionuar. Andaj edhe mesazhet e drejtorit të CIA-s sigurisht janë në këtë vijë që Kosova të bashkërendojë aktivitetet e saj në mbarë territorin e Kosovës”, përfundon ai.

Kryeministri Albin Kurti, ka pritur sot në takim drejtorin e CIA-s, William Burns, ku më pas u tha se kjo vizitë përfaqëson moment të rëndësishëm historik në marrëdhëniet bilaterale Kosovë-Shtetet e Bashkuara të Amerikës. Gjatë vizitës së tij dy-ditore në Kosovë, Burns u prit në takim dje edhe nga presidentja, Vjosa Osmani.