Cila është më e mirë për shëndetin e zemrës: ushqimi i shëndetshëm apo ushtrimet fizike?

Kjo është një pyetje e kamotshme: a është ushqimi i shëndetshëm, ushtrimet fizike apo kombinimi i të dyjave mënyra më e mirë për ta mbrojtur zemrën tuaj?

Siç duket, kjo nuk ka aspak rëndësi përderisa jeni duke humbur peshë – të paktën kështu thonë hulumtimet e reja në “American Journal of Clinical Nutrition”, transmeton Telegrafi.

Pjesëmarrësit e këtij studimi, të cilët kishin qenë mbipeshë dhe të moshës së mesme, ishin ndarë në tri grupe: grupi i parë e kishte zvogëluar konsumimin e kalorive për 20 për qind; grupi i dytë e kishte rritur aktivitetin fizik për 20 për qind; dhe grupi i tretë e kishte zvogëluar konsumimin e kalorive për 10 për qind.

Hulumtuesit kishin zbuluar se çdonjëra nga këto strategji kishte pasur efikasitet të njëjtë në përmirësimin e shëndetit të zemrës – siç ka qenë zvogëlimi i shtypjes së lartë të gjakut, zvogëlimi i kolesterinës së keqe dhe përmirësimi i nivelit të rrahjeve të zemrës – dhe të gjitha këto ndryshime kishin ndodhur përderisa pjesëmarrësit humbnin peshë gjatë procesit.

Në fakt, pjesëmarrësit të cilët kishin humbur të paktën 7 për qind të peshës së tyre të trupit e kishin zvogëluar rrezikun për zhvillimin e sëmundjeve të zemrës deri në 22 për qind.

Megjithatë, kombinimi i dietës dhe ushtrimeve fizike mund të shërbejë si dyshe perfekte për mbrojtjen e zemrës, ndërsa e bën edhe më të lehtë procesin e humbjes së peshës. /Telegrafi/