Challandes: Është detyrë e imja si trajner të marr vendime, nganjëherë rrezikoj

Bernard Challandes është shprehur i kënaqur me paraqitjen e skuadrës së Kosovës në triumfin prej 4-0 kundër Azerbajxhanit.

“Mendoj se ishte shumë e rëndësishme, sepse deri më tani gjithmonë ishte mirë, por në fund ishte ndeshja e fundit dhe kualifikimi për gjysmëfinale”, ka thënë trajneri pas takimit.

Ai ka thënë se të gjithë kishin ëndërruar për këtë kualifikim dhe e kanë plotësuar dhe konfirmuar kualifikimin dhe ekipi është shumë i kënaqur.

Përzgjedhësi i ka uruar lojtarët e tij, të cilët pos paraqitjeve teknike dhe taktike, tregoi se është një grup i kompletuar.

“Mendoj se është fitore e skuadrës, të gjithë kanë bërë punë të mirë, sulmuesit, mesfushorët dhe sidomos mbrojtësit kanë bërë paraqitje shumë të mirë që të katërtit, si edhe mesfushorët defensivë. Meritor për këtë sukses ishte e gjithë skuadra”, ka thënë më tej trajneri.

Natyrisht se ai është pyetur edhe për vendimin që ta inkuadronte në portë Arijanet Muriqin duke e lënë në bankën rezervë kapitenin Samir Ujkani.

Challandes theksoi se e kishte përcjellë portierin e ri që e konsideron shumë të mirë, prandaj vendosi se ishte koha që ai t’i dëshmonte cilësitë që ka.

“Është detyrë e imja si trajner të marr vendime, nganjëherë rrezikoj”, ka thënë ia duke theksuar se Ujkani ka pasur sjellje shumë të mirë dhe i ka ndihmuar Muriqit, ndërkohë që për të ardhmen e ka përmendur edhe portierin Visar Bekaj. /Telegrafi/