Certifikohen 150 të rinj në programin “Coca-Cola përkrah rininë”

Në kuadër të programit “Coca-Cola përkrah Rininë” është mbajtur eventi i rrjetëzimit, i cili ka certifikuar 150 të rinj që kanë ndjekur trajnimin gjatë muajve tetor-nëntor.

Ky aktivitet nga të pranishmit është vlerësuar si fuqizues për të rinjtë, duke i përgatitur për tregun e punës, duke pasur parasysh shkallën e lartë të papunësisë me të cilën përballet vendi ynë.

Drejtori i Coca-Cola HBC Kosova, Neritan Tira beson se numri i të rinjve që do të ndjekin trajnimet e këtij programi gjatë vitit të ardhshëm do të trefishohet.

“Së pari, ne kemi 300 të rinj që kanë qenë pjesë e këtij programi për këtë vit, dhe këtë numër vitin e ardhshëm do të duam ta trefishojmë, sepse shikojmë që kemi mundësi, kemi potencial dhe është i nevojshëm, së dyti mbi 57 për qind e pjesëmarrësve kanë gjetur mundësi punësimi apo kanë marrë shkas nga ky program për të ecë përpara, dhe për të bërë diçka me jetën e tyre”, ka thënë Tira.

Zëvendësministri i Arsimit, Shkencës dhe Teknologjisë, Heset Sahiti tha se Kosova, ani pse ka të rinj me potenciale të mëdha, në shkallë të lartë vazhdon të jetë papunësia.

“Numrin më të madh të papunëve grup-mosha 18-30 vjeçare. Regjioni i Kosovës për zhvillimin e sistemit të arsimit formal dhe jo formal përcaktohet nga situata e saj politike ose ekonomike. Roli i arsimit, shkencës dhe teknologjisë në kontributin për zhvillimin social të vendit dhe në përmbushje të qëllimeve më të gjëra  politike, konsiderohet vendimtar. Në përgjithësi, vizioni i qeverisë është për një sistem arsimor gjithëpërfshirës, bazuar në parimet e të mësuarit gjatë gjithë jetës dhe duke ofruar arsim cilësor për të gjithë”, tha ai.

Sahiti ka thënë se këto programe do të fuqizojnë të rinjtë, të cilët do të përgatiten për tregun e punës.

Ndërsa ,zëvendësministri i Punës dhe Mirëqenies Sociale, Vesel Makolli tha se ky program është i qëlluar, pasi iu mundëson të rinjve të aftësohen për të ardhmen.

“Programi “Coca-Cola përkrahë rininë” , është program i qëlluar për rininë tonë me anë të cilit është dhënë mundësia, që rinia jonë të perfeksionojë potencialin e tyre për një performancë  sa më të mirë për të ardhmen. Republika e Kosovës përbëhet nga një popullsi e re, prandaj institucionet tona janë fokusuar në zhvillimin dhe aftësimin e kapitalit njerëzor duke e shikuar rininë si resursi kryesor”, u shpreh Makolli.

I pranishëm në këtë ceremoni ishte edhe drejtori i Odës Ekonomike Amerikane, Arian Zeka, tha se ky aktivitet  e po ashtu edhe “Java Globale e Ndërmarrësisë”, tregojnë se në Kosovë ka shpresë.

“Projektet si ky, i mbështetur dhe i iniciuar nga Coca-Cola janë unike për ngritjen e shkathtësive dhe përgatitjen më të mirë të tyre për tregun e punës. Aktivitetet si ky i sotëm dhe një tjetër i mbajtur i ngjashëm disa muaj më parë, janë dëshmi konkrete që investimet që Coca-Cola bën në komunitetet që ju operoni”, tha Zeka.

Ndryshe, gjatë këtij viti në këtë program janë trajnuar 300 të rinj dhe ky aktivitet po mbahet për herë të dytë në Kosovë. /Telegrafi/