Caroline Ziadeh emërohet shefe e re e UNMIK-ut

Misioni i Administratës së Përkohshme të Kombeve të Bashkuara në Kosovë (UNMIK) tashmë ka shefe të re, Caroline Ziadeh.

Kështu ka njoftuar sekretari i Përgjithshëm i Kombeve të Bashkuara António Guterres.

Caroline Ziadeh nga Libani do të jetë përfaqësuese e re speciale dhe shefe e Misionit UNMIK në vendin tonë.

Ziadeh pason Zahir Tanin nga Afganistani, ndaj të cilit sekretari i Përgjithshëm tha se i është mirënjohës për përpjekjet e tij për paqe dhe stabilitet në Kosovë dhe rajon, si dhe për udhëheqjen e tij efektive të Misionit.

Në njoftim thuhet se shefja e re e UNMIK-ut pasi ka shërbyer që nga viti 2017 si drejtoreshë e Departamentit të Organizatave Ndërkombëtare, Konferencave dhe Shërbimeve Kulturore në Ministrinë e Punëve të Jashtme dhe Emigrantëve të Libanit tashmë në detyrën e re vjen me një përvojë gati 30 vjeçare në diplomacinë ndërkombëtare, duke përfshirë edhe shërbimin diplomatik të Libanit.

“Ajo ka njohuri të gjera për Kombet e Bashkuara, pasi ka udhëhequr delegacionet kombëtare në Kombet e Bashkuara për çështje si migrimi, zhvillimi i qëndrueshëm dhe puna e Ministrisë në lidhje me të drejtat e njeriut dhe agjendën e grave, paqes dhe sigurisë”, thuhet në njoftimin e Kombeve të Bashkuara.

Ziadeh ka një diplomë Bachelor dhe Master në ekonomi dhe shkenca politike nga Universiteti i Libanit në Bejrut dhe diploma në “Marrëdhënie ndërkombëtare” nga Universiteti Libre de Bruxelles dhe Akademia Diplomatike e Vjenës. Ajo flet rrjedhshëm arabisht, anglisht dhe frëngjisht. /Telegrafi/