Bytyqi: Pa materiale në gjuhën shqipe, nuk mund të debatohen 2.673 amendamente

Seanca e Komisionit për financim dhe buxhet nuk ka filluar sot pasi deputeti i LSDM-së, Fatmir Bytyqi, ka kërkuar shtyrjen e seancës për Projektligjin për ndryshimin e Ligjit për Drejtorisë Doganore, pasi materialet e dorëzuara nuk ishin përkthyer në gjuhën shqipe, e cila është shkelje e Rregullores së Kuvendit.

Në rendin e ditës të Komisionit ishin 2673 amendamente të dorëzuara nga deputetët e “Levicës”, të cilat do të shqyrtoheshin, por që nuk ishin dorëzuar edhe në gjuhën shqipe.

Bytyqi theksoi se neni 3, paragrafi 4 i Rregullores së Kuvendit parasheh që deputetët që flasin gjuhë të ndryshme nga gjuha maqedonase, të cilën e flasin së paku 20% e qytetarëve, materialet duhet t’i marrin në gjuhën e tyre, në kohë dhe në mënyrë të plotë, në mënyrë që të mund të marrin pjesë në debat në baza të barabarta.

Në ndërhyrjen e tij procedurale, Bytyqi theksoi se sipas informacioneve të marra nga Sekretari i Përgjithshëm i Kuvendit, përgjigja ndaj kërkesës së tij ishte se dikush duhej të miratonte më tej amendamente që të përkthehen në gjuhën shqipe. Ai e vlerësoi këtë përgjigje si absurde, sepse përkthimi është një e drejtë procedurale dhe kushtetuese që duhet respektuar, dhe të mos jetë subjekt i miratimeve shtesë ose llogaritjeve politike.

Në fund, kryetarja e Komisionit, Sanja Llukarevska, konstatoi se nuk ka kushte teknike për vazhdimin e punës, gjegjësisht nuk mund të sigurohet përkthimi i materialeve në gjuhën shqipe, prandaj edhe e shtyu seancën.