Bursa të plota për vajzat në Siguri Kibernetike nga ICK dhe LuxDev

Innovation Centre Kosovo, nëpërmjet programit “DevelopHer”, në bashkëpunim me LuxDev, Agjencinë për Bashkëpunim Zhvillimor të Luksemburgut, ofron 12 bursa të plota për vajzat nga Kosova, për programin 6-mujor të trajnimit profesional në Siguri Kibernetike. Afati i fundit për aplikim: 23 Janar 2025.

Bursat e “DevelopHer” janë pjesë e Programit “TechEco Pathways”, një nismë transformuese e financuar nga LuxDev, Agjencia për Bashkëpunim Zhvillimor e Luksemburgut, me qëllim të mbështetjes së inovacionit dhe qëndrueshmërisë në Kosovë.

Programi “TechEco Pathways” i cili do të zgjasë 24 muaj, përfshinë tre (3) aktivitete kryesore: 1) GreeTech – trajnime dhe punë praktike me pagesë në industrinë e TIK dhe Energjisë së Ripërtërishme; 2) DevelopHer – ngritja e aftësive për vajzat dhe gratë në programim, siguri kibernetike, dhe industri kreative; dhe 3) Innovation Challenges – garat inovative për ruajtjen e energjisë, efiqiencës, “smart cities”, dhe ruajtjes së ambientit.

Kjo nismë planifikon organizimin e dhjetë (10) trajnimeve profesionale për mbi 120 të rinj nga Kosova, punë praktike me pagesë për të diplomuarit, mentorim, si dhe dy (2) edicione të garave me çmime & shpërblime të shumta për ekipet fituese.

Programi i parë i hapur për aplikime – Siguria Kibernetike, fton vajzat nga Kosova të aplikojnë deri më 23 Janar, dhe të bëhen pjesë e një përvoje transformuese profesionale. Kilko këtu për më shumë informata rreth programit, afateve dhe aplikimit.

Informata të rëndësishme për aplikueset nga Kosova:

Afati i fundit për aplikim: 23 Janar 2025;

Vegëzën për aplikim e gjeni këtu;

Prisni ftesën (email) për paraqitje në testin me shkrim;

Testim mbahet fizikisht ne ICK më 25 Janar (e Shtunë) në ICK;

Rezultatet e testit publikohen më 25 Janar në mbrëmje;

Kandidatet e përzgjedhura fillojnë ligjëratat më 27 Janar, në Innovation Centre Kosovo (ICK).

TechEco Pathways synon të adresojë mungesat kritike të aftësive në sektorët e energjisë së ripërtërishme dhe Teknologjisë së Informacionit dhe Komunikimit (TIK) në Kosovë. Duke u përqendruar në aftësimin e të rinjve, veçanërisht grave, me shkathtësitë e nevojshme për punësim të menjëhershëm dhe plotësimin e zbrazëtirës në treg, programi synon të kontribuojë në rritjen ekonomike të qëndrueshme, dhe zhvillimin e industrisë vendore.

Ky program mbështetet nga projekti “Shkathtësi për punësim të qëndrueshëm në Kosovë”, i financuar nga Dukati i Madh i Luksemburgut dhe i cili zbatohet nga LuxDev, Agjencia për Bashkëpunim Zhvillimor e Luksemburgut.

ICK & LuxDev ju urojnë sukses të gjitha vajzave aplikuese. /Telegrafi/