Burj Khalifa ndriçohet me mesazhe mbi coronavirusin, flet edhe shqip: “Ne jemi të gjithë në këtë së bashku”

Emiratet e Bashkuara Arabe kanë filluar një fushatë të titulluar “Qëndroni në shtëpi, qëndroni të sigurt”, për të inkurajuar banorët që të mos i lënë shtëpitë e tyre në mesin e pandemisë së coronavirus, që ka vrarë dy dhe infektoi 248 në shtetet e Gjirit.

Mesazhi #Qëndronështëpi është shfaqur në ndërtesën më të lartë në botë, Burj Khalifa në gjuhën arabe dhe angleze, pasi qeveria u bëri thirrje banorëve që të përmbahen dhe të mos dalin, përveç nëse e kanë shumë të nevojshme ose për arsye pune, transmeton Telegrafi.

Por, këto ditë, sipërfaqja e kësaj ndërtese në Dubai është ndriçuar edhe me mesazhe vetëdijësuese në gjuhë të tjera, ndërsa nuk ka munguar as porosia në shqip. “Ne jemi të gjithë në këtë së bashku”, ishte mesazhi në shqip, që u pa në sipërfaqen e hotelit.

Në Emiratet e Bashkuara, janë ndërmarrë masa mjaft të ashpra në mënyrë që të parandalohet përhapja e pandemisë. Të gjitha qendrat tregtare dhe tregjet e hapura, përveç tregut të peshkut, perimeve dhe mishit do të mbyllen për dy javë, njoftoi në fillim të javës Ministria e Shëndetësisë.

Gjatë të njëjtës kohë, restorantet do të jenë të mbyllura ndërsa iu lejohet vetëm të shpërndajnë ushqime nëpër shtëpi. Deri në fund të marsit, do të jenë të mbyllura të gjitha plazhet publike, pishinat, kinematë, parqet e lojërave dhe atraksionet turistike. /Telegrafi/