Bullgaria më në fund mori një kryeministër pas shtatë palë zgjedhjeve në katër vjet

Rosen Zhelyazkov nga partia qendër e djathtë, GERB është zgjedhur kryeministër i Bullgarisë pas katër viteve të paqëndrueshmërisë politike, gjatë të cilave vendi organizoi shtatë zgjedhje.

Partia e tij siguroi 69 mandate në organin legjislativ prej 240 anëtarësh në zgjedhjet e tetorit. Ai fitoi mbështetjen e një koalicioni të gjerë partish të majta, populiste dhe qendrore, të cilëve iu falënderua gjatë fjalimit të tij në parlament.

“Do ta filloj në një mënyrë disi jo konvencionale dhe në fillim do të shpreh mirënjohjen për partnerët e koalicionit me të cilët arritëm të arrijmë një marrëveshje në një periudhë të vështirë, duke lënë mënjanë dallimet tona politike dhe ideologjike, dhe duke nënshkruar marrëveshjen”, tha Zhelyazkov.

Ky ifundit shtoi se prioritetet e qeverisë do të përfshijnë mbrojtjen e sundimit të ligjit dhe angazhimin që Bullgaria t’i bashkohet eurozonës. Vendi hyri plotësisht në zonën Schengen pa kufij më 1 janar, por nuk është anëtare e eurozonës.

Bullgaria ka qenë e prekur nga paqëndrueshmëria politike që nga viti 2020, kur shpërthyen protesta masive për shkak të, siç u theksua atëherë nga organizatorët, “liderëve mafiozë oligarkikë që kanë marrë kontrollin mbi institucionet shtetërore”.

Protestat vazhduan edhe pas zgjedhjeve të fundit për shkak të akuzave për blerje votash, ndërsa negociatat dy mujore përfunduan me zgjedhjen e Rosen Zhelyazkovit. /Telegrafi/