Bashkimi i Sindikatave të Pavarura të Kosovës, përmes një njoftimi të bërë për media kanë bërë të ditur se e mbështetesin protestën e punëtorëve të Korporatës Energjetike të Kosovës.
BSPK, ka kërkuar nga menaxhmenti i KEK-ut që të reflektojë sa më shpejtë në mënyrë që të mos jetë vonë, transmeton Telegrafi.
"Bashkimi i Sindikatave të Pavarura të Kosovës solidarizohet plotësisht me protestën dhe kërkesat e drejta të punëtorëve të KEK-ut. Ne jemi me ju në këtë betejë sindikaliste për drejtësi sociale duke i përkrahur kërkesat tuaja siç janë: 1. Realizimin i Marrëveshjes Kolektive në nivel të KEK-ut; 2. Rishikimi i ligjit për paga aty ku përfshihen punëtorët e KEK-ut si dhe rritja e shujtës së ushqimit nga 1.74€ në 3.5€; 3. Paga të vazhdueshme dhe të përhershme jubilare; 4. Rivitalizmi i Termocentralit Kosova A; 5. JO mbylljes së Kosova A, pasiqë reduktohen shumë vende pune dhe rëndohet situata financiare e qindra e qindra familjeve të punëtorëve të KEK-ut. BSPK përkrahë fuqimisht kërkesat e punëtorëve dhe kërkon nga menaxhmenti i KEK-ut që të reflektojë sa më pare sa nuk është bërë vonë", thuhet në njoftimin e BSPK-së.
