​Borrell: Shpresoj që Kurti e Vuçiq të takohen deri në verë

Përfaqësuesi i lartë i Bashkimit Evropian për politikë të jashtme dhe siguri Josep Borell ka thënë se shpreson se “para verës” do të vie deri te takimi i ri në mes të kryeministrit të Kosovës, Albin Kurtit dhe presidentit të Serbisë, Aleksandar Vuҫiq në kuadër të dialogut në Bruksel.

Duke folur pas takimit të ministrave të jashtëm të BE-së, ku rrethanat në rajon ishin në rend të ditës, Josep Borell deklaroi se ministrat evropian dëshirojnë të shohin përparim në proces të dialogut për normalizimin e raporteve.

“Kemi nevojë për qasje konstruktive dhe progres të shpejtë, proces të normalizimit të raporteve në mes të Kosovës dhe Serbisë. Secila palë pajtohet rreth kësaj çështje por kur të ulen bashkë, atëherë përparimi bëhet i vështirë”, tha Borell.

Ai në emër të 27 ministrave të jashtëm të BE-së porositi domosodoshmërinë e implementimit të të gjitha marrëveshjeve të arritura deri më tani në kuadër të dialogut.

Në takimin ministror të të hënës, morën pjesë edhe gjashtë ministra të jashtëm nga secili shtet i rajonit. Kosovën në këtë takim e ka përfaqësuar ministrja e jashtme, Donika Gërvalla.

Në takim, gjithashtu është folur për nevojën që të lëvizet drejt liberalizimit. Josep Borell në cilësinë e zëvendëspresidentit të Komisionit Evropian (KE) tha se vazhdojnë të përkrahin liberalizimin e vizave.

KE që nga viti 2018 insiston se Kosova i ka pëmrbushur të gjitha kriteret për regjimin pa viza, por akoma nuk është arritur vendimi politik në nivel të Këshillit të ministrave të BE-së.