“Bomba” e një prillit: Ra qeveria ose doli vetëm BDI?

Që nga mëngjesi i sotëm askush nuk ka përgjigje nëse Maqedonia ka qeveri funksionale, kush udhëheq me shtetin, kush është komandanti suprem dhe kush ka kompetenca për politikën e jashtme, transmeton Telegrafi Maqedoni.

Dilema përforcohet akoma më shumë me formulimin në njoftimin e BDI që partia ka vendosur “ti tërheq” ministrat, e jo “të del nga qeveria“, „ta braktis koalicionin “, ose funksionarët “të japin dorëheqje” nga funksionet e deritanishme, e gjithë kjo sepse kjo paraqet një praktikë të re në jetën politike të Maqedonisë për të cilën ligjvënësi nuk ka paraparë zgjidhje.

Sipas Kushtetutës së Republikës së Maqedonisë, solucioni më i afërt lidhur me këtë që ndodhi mbrëmë është paraparë në nenin 94 në të cilin thuhet që nëse kryetari i Qeverisë propozon shkarkim të më tepër se një të tretës së përbërjes Qeveritare, Kuvendi vendos se si do të veprohet lidhur me zgjedhjen e Qeverisë së re.

Nga 26 resorët ministror në Qeveri, BDI udhëheq me nëntë resorë, që është një e treta e përbërjes qeveritare.
Sipas nenit 90 të Kushtetutës, në raste të këtilla, kryetari i Republikës së Maqedonisë do të duhet në afat prej dhjetë ditësh mandatin për formim të qeverisë t’ia dorëzojë kandidatit të partisë, respektivisht partive që kanë shumicë në Kuvend. Mandatari në afat prej 20 ditësh, Kuvendit i dorëzon program dhe e propozon përbërjen e Qeverisë.
Qeverinë me propozim të mandatarit dhe në bazë të programit e zgjedh Kuvendi me shumicë votash nga numri i përgjithshëm i deputetëve.

Tani për tani mbetet që të presim qartësim nga BDI, nëse bëhet fjalë për tërheqje të ministrave, dalje nga qeveria, braktisja e koalicionit ose dorëheqja e funksionarëve, dhe njoftim për hapat e mëtutjeshme. /Telegrafi/