Biden lëshon urdhër që i hap rrugën sanksioneve në Sudan

Presidenti i Shteteve të Bashkuara të Amerikës, Joe Biden nënshkroi një urdhër ekzekutiv të enjten duke hapur rrugën për të sanksionuar individët e përfshirë në dhunën e fundit në Sudan që la qindra të vdekur dhe e futi shtetin afrikan në kaos.

Biden ka thënë në një deklaratë se urdhri i tij “do të mbajë individë përgjegjës për kërcënimin e paqes, sigurisë dhe stabilitetit të Sudanit…dhe shkeljeve të rënda të të drejtave të njeriut.”

Presidenti theksoi se dhuna që po ndodh në Sudan është “një tragjedi – dhe është një tradhti e kërkesës së qartë të popullit sudanez për qeveri civile dhe një tranzicion drejt demokracisë”.

“Unë bashkohem me popullin paqedashës të Sudanit dhe liderët në mbarë botën në thirrjen për një armëpushim të qëndrueshëm midis palëve ndërluftuese”, citohet të ketë thënë Biden.

Luftimet e Sudanit shpërthyen më 15 prill midis dy komandantëve të cilët vetëm 18 muaj më parë orkestruan bashkërisht një grushtshtet ushtarak për të prishur tranzicionin e vendit drejt demokracisë.

Lufta për pushtet midis shefit të forcave të armatosura, gjeneral Abdel-Fattah Burhan, dhe kreut të grupit paraushtarak të Forcave të Mbështetjes së Shpejtë, Gjeneral Mohammed Hamdan Dagalo ka bërë që qindra mijëra sudanezë të zhvendosen.

Shumë shtete kanë nxituar të evakuojnë qytetarët e tyre nga Sudani, megjithëse miliona mbeten atje mes një armëpushimi të brishtë.

E Kombet e Bashkuara paralajmëruan të mërkurën se njerëzit e vendit “po përballen me një katastrofë humanitare”.

Konflikti ka vrarë të paktën 550 njerëz, përfshirë civilë dhe ka plagosur më shumë se 4.900 të tjerë.

Të paktën 334.000 njerëz janë zhvendosur brenda Sudanit dhe dhjetëra mijëra të tjerë në vendet fqinje, Egjipt, Çad, Sudanin e Jugut, Republikën e Afrikës Qendrore dhe Etiopinë, sipas agjencive të OKB-së. /rel/