Berisha flet për të ardhmen: Do luaj në Gjermani ose Belgjikë

Reprezentuesi i përfaqësues së Kosovës, Bernard Berisha ishte njëri ndër futbollistët më të mirë në fitoren e përfaqësues sonë kundër Guineas (2-0).

Mesfushori pejanë, i cili tashmë është futbollisti kyç tek Skënderbeu i Shqipërisë, në një intervistë për KosovaPress, e ka pranuar se ka pritur ftesën nga përzgjedhësi i Shqipërisë, Gianni De Bias, por ish-futbollisti i Besës së Pejës, tashmë ka zgjedhur Kosovën.

“Është folur shumë dhe presioni ka qenë shumë i madh dhe besoj se ka pasur disa kontakte, por diçka konkrete nuk ka pasur, pritet në vazhdim, por unë prapë se prapë do të luajë për Kosovën dhe do të jap më të mirën vendim tim”, ka thënë Berisha.

Berisha është njëri nga futbollistët e Kosovës që tashmë me Skënderbeun ka shijuar Ligën e Kampionëve. Falë performancës së shkëlqyer në sfidat e Championsit, tashmë disa klube evropiane janë vënë në ndjekje të Berishës.

Ai e pranon së në adresë të tij kanë ardhur shumë oferta nga klubet e huaj, por Berisha thekson se për të ardhmen e tij vendos presidenti i Skënderbeut. Berisha është i bindur se me 1 janar karrierën do ta vazhdojë në Belgjikë ose Gjermani.

“Është e vërtetë se për momentin kam shumë oferta nga shumë klube, dhe unë kam kontaktuar me presidentin dhe menaxherin tim, Shkëmbim Qorrmemtin. Unë kam thënë se dua të jem i qetë dhe të mos përzihem për momentin se jam i koncentruar te lojërat e mia dhe i kam thënë presidentit ti vendos për të ardhmen time”.

“Unë kam kontratë deri më 15 maj dhe 99 përqind më 1 janar unë do të ndërrojë skuadrën. O në Belgjikë o në Gjermani do të jetë njëra nga këto dy shtete”, ka theksuar Berisha.