Bashkimi s’ka mu ndal

Bashkimi tashmë e ka befasuar Ligën Ballkanike, ku ka arritur ta kalojë grupin në sezonin debutues në këtë garë.

Por, prizrenasit thonë se nuk do të ndalen me kaq. Nëse nuk ia dalin në Ligën Ballkanike, atëherë në basketbollin kosovar prizrenasit besojnë se do ta fitojnë ndonjë trofe në këtë edicion. Ata paralajmërojnë edhe përforcime të reja.

Befasia e këtij edicioni në Ligën Ballkanike pa dyshim që është skuadra e Bashkimit, e cila qysh në debutim ka arritur që ta kalojë fazën e grupeve ende pa përfunduar ky rreth garues.

Menaxheri i prizrenasve, Arlind Kaçaniku, është shprehur i lumtur me arritjet në stinorin vjeshtor. “Meqenëse është viti debutues synimi ynë ishte të kalojmë fazën e grupeve, madje ne këtë e kemi kaluar pa përfunduar faza grupore. Kemi zhvilluar ndeshje jashtëzakonisht të mira, duke mposhtur ekipe të forta si Mornari dhe Prishtina. Besoj se edhe në stinorin pranveror do të arrijmë të paraqitemi në këtë mënyrë”, u shpreh fillimisht Kaçaniku. Menaxheri i prizrenasve shpreson se ndonjë përforcim që do të sjellin në Prizren do të fitojnë ndonjë trofe. “Kemi një ekip shumë të mirë, por jemi duke shikuar të përforcohemi me një apo dy lojtarë të huaj kualitativë. Jemi në bisedime me disa lojtarë, por nuk ka asgjë konkrete. Shpresojmë të vazhdojmë me këtë formë dhe të arrijmë të fitojmë një trofe, i cili është edhe synimi ynë këtë edicion”, u shpreh ai.

Sa i përket Ligës Ballkanike, Kaçaniku thotë se skuadra e portokalltë tashmë e ka arritur objektivin, duke e kaluar matematikisht grupin. Por, kjo nuk do të thotë se prizrenasit janë kënaqur me kaq. “Sa i përket Ligës Ballkanike, do të shkojmë hap pas hapi dhe sigurt”, theksoi Kaçaniku.

Bashkimi stinorin vjeshtor në Superligën e Kosovës në basketboll e mbylli në pozitën e tretë me 21 pikë, duke regjistruar tetë fitore dhe katër humbje. Ndeshjen e fundit në kuadër të BIBL-së ndaj Lovcenit ekipi nga qyteti i lashtë do ta zhvillojë më 12 janar.

Bashkimi vlerësohet si njëri prej katër ekipeve më të forta të Kosovës në periudhën e pasluftës. Por, kushtet financiare kanë bërë që forma dhe këtij ekipi të ketë formë të luhatshme. Nganjëherë ka ditur të jetë tepër i fortë, por nga njëherë edhe ka zhgënjyer. Mirëpo, thuajse gjithnjë ka garuar në “Play-Off” të Superligës së Kosovës, bashkë me Sigal Prishtinën, Pejën e Trepçën.