Bashkimi Evropian refuzon planin e Theresa May për BREXIT-in

Propozimi i marrëveshjes së tregtisë së Britanisë nuk është miratuar në Bruksel, duke qenë se është konsideruar si e tepërt.

Nëse Theresa May kishte shpresuar se BE-ja do t’i përgjigjej pozitivisht tonit pajtues që ajo kishte gjatë fjalimit të saj të fundit, ku përshkruante marrëdhënien e ardhshme të tregtisë së dëshiruar nga britanikët, do të duhej që të kalonin vetëm pak ditë dhe ajo të merrte zhgënjimin e radhës.

Dhe pikërisht, pesë ditë pas deklaratës së May, Donald Tusk, Presidenti i Këshillit Evropian, nxori një projektligj për negociatat e ardhshme tregtare që kundërshtonin me vendosmëri propozimin e saj kryesor, shkruan The Economist, përcjell Telegrafi.

May kishte parashtruar idenë e ‘divergjencës së menaxhuar’ nga rregullat e BE-së, në këmbim të aksesit sektor më sektor në tregun e saj të vetëm dhe agjencive rregullatore të BE-së, si ato për ilaçe, kimikate dhe linjat ajrore. Projektligjet e hedhin poshtë një zgjedhje të tillë, sepse do të rrezikonte shumë tregun e vetëm. Tusk tha më tej se, duke qenë se May po e gjen veten në një situatë të vështirë, si pasojë e largimit nga tregu i vetëm dhe bashkimi doganor, e vetmja mënyrë për të ndalur lëvizjen e lirë të njerëzve dhe për të shpëtuar nga Gjykata Evropiane e Drejtësisë, ishte arritja e një marrëveshjeje të lirë tregtare, e ngjashme me atë të Kanadasë.

Ai sugjeroi se ajo duhet të jetë ambicioze dhe të përfshijë të gjitha mallrat, por të jetë më e kufizuar për sa u përket shërbimeve, duke nënkuptuar se nuk do të përfshijë ato financiare. Nuk do të ishte e mundur, argumentoi ai, që Britania të kombinonte përfitimet që gëzon Norvegjia, e cila është jashtë BE-së, por në tregun e saj të vetëm, me detyrimet e kufizuara të Kanadasë. /Telegrafi/