Banorët e disa lokaliteve në Shtime përballen me rrugët të degraduara

Banorë në disa lokalitete në komunën e Shtimes prej më shumë se dy vitesh po përballen me degradim të rrugëve të cilat nuk po mirëmbahen nga askush. Me gjendje mjaftë të rëndë të infrastrukturës rrugore po përballen banorët e disa lokaliteteve të cilat e frekuentojnë rrugën prej fshatit Rashincë-Gllavicë e deri në Koshare që lidhet me magjistralen e Ferizajt . Rruga me gropa ka bërë që banorët të dërgojnë fotografi e ankesa edhe në platformën ndreqe.com.

Arben Ademi, banor nga fshati Davidoc ka thënë për Telegrafin se qindra e mijëra banor e frekuentojnë rrugën Davidoc- Rashincë- Gllavicë dhe kalojnë në magjistrale ne fshatin Koshare të Ferizajt. Sipas tij, komuna është përgjegjëse për riparimin e gropave.

“Në këtë rrugë qarkullojmë shumë shpesh dhe kalojmë në magjistrale në drejtim të Ferizajt. Është rrugë që përshkon disa lokalitete, mirëpo gropat po e vështirësojnë qarkullimin. Prandaj, kërkojmë nga institucionet komunale që sa më shpejtë ta planifikojnë renovimin e këtyre gropave sepse po dëmtohen automjetet”, ka thënë Ademi.

Rreth kësaj cështje të hënën ka reaguar edhe subjekti opozitar PDK-ja në Shtime.

“Ne si subjekt kemi pranuar ankesë nga qytetarët lidhur me rrugët e dëmtuara, gropat në rrugë të cilat paraqesin rrezik të madh për vozitësit, veçanërisht për fëmijët dhe nxënësit që lëvizin në afërsi të këtyre rrugëve. Për më tepër, këto gropa rrezikojnë edhe këmbësorët, sidomos fëmijët që ndjekin mësimin në shkolla. Është e domosdoshme që pushteti aktual të ndërhyjë për riparimin e tyre për të garantuar sigurinë e qytetarëve dhe për të shmangur incidentet e mundshme e jo të proklamojë”, thuhet në reagimin e PDK-së.

Në anën tjetër me gjithë insistimin e Telegrafit, kryetari i Komunës së Shtimes Qemajl Aliu, nuk ka qenë i qasshëm për të marrë një deklaratë lidhur me këtë çështje. Po ashtu nuk ka kthyer përgjigje as zyra për informim në këtë komunë.